Prezıdent: Áleýmettik kómekti shynymen muqtaj azamattar ǵana alýy tıis

ASTANA. KAZINFORM – Memleket basshysy Qasym-Jomart Toqaev áleýmettik kómek kórsetý júıesinde tártip ornatý qajettigin aıtty. Bul týraly ol Aqmola oblysyna jasaǵan jumys sapary barysynda ótken keńeste málimdedi.

Prezıdent Qazaqstannyń áleýmettik memleket ekenin atap ótti.

– Biz eshqashan áleýmettik qyzmet kórsetýden bas tartpaımyz. Bul – Konstıtýtsııaǵa sáıkes bizdiń mindetimiz. Biraq bul salada tártip ornatý qajet. Memleketten áleýmettik kómek shynymen muqtaj adamdarǵa berilýi tıis. Al jumys isteýge qabiletti, ózin, otbasyn, ata-anasyn qamtamasyz ete alatyn azamattar eńbek etýi kerek, – dedi Qasym-Jomart Toqaev.

Memleket basshysy eldegi kóshi-qon máselesine de nazar aýdardy. Onyń aıtýynsha, bul salada da júıeli túıtkilder bar.

– Men kóshi-qon máselesin ótkir qoıdym. Ol kóptegen problemalardy týyndatady. Mysaly, Astanada 400 myń adam tirkeýsiz qalyp otyr. Ákimdik olarǵa qyzmet kórsetip, jaǵdaı jasaýǵa májbúr. 400 myń adam degenimiz – tutas bir qala. Al ol eshbir statıstıkada eskerilmegen. Bul – ekonomıkada da, áleýmettik saıasatta da teńgerimsizdik týdyrady. Jalpy alǵanda, elde 100-den astam áleýmettik kómek túri bar, – dedi Prezıdent.

Qasym-Jomart Toqaev áleýmettik kómekti ádil ári naqty baǵytta uıymdastyrý qajettigin erekshe atap ótti.

Aıta keteıik, Memleket basshysy Shahmat úıine bardy.