Prezıdent áleýmettik kásipkerlik bastamasyn qoldady - Emın Áskerov

NUR-SULTAN. QazAqparat – Memleket basshysy áleýmettik kásipkerlik bastamasyna qoldaý bildirdi. Bul týraly Prezıdentpen kezdesýden keıin kásipker Emın Áskerov málim etti, dep habarlaıdy QazAqparat tilshisi.

«Búgin Prezıdent áleýmettik kásipkerlermen kezdesti. Kezdesý barysynda kásipkerler áleýmettik máselelerdi qalaı sheshetinin aıtyp berdi. Atap aıtqanda, áńgime halyqtyń áleýmettik osal toptarynan shyqqan azamattardy jumyspen qamtý jáne basqa da máseleler týraly aıtyldy. Prezıdent bizdiń bastamalarymyzǵa belsendi túrde qoldaý bildirip, memleket bıznespen qatar, áleýmettik máselelerdi sheshýge qatysatyn kásipkerlerge barlyq qoldaý kórsetiletinin aıtty. Prezıdent sonymen qatar ústimizdegi jyldyń qazan aıynyń sońynda áleýmettik kásipkerler forýmyn uıymdastyrýǵa bolatynyn jetkizdi. Oǵan Memleket basshysy bıznestiń osy salasyna serpin berý úshin qatysady», - dedi Emın Áskerov.

Onyń aıtýynsha, Prezıdentpen kezdesýge úsh áleýmettik kásipker qatysqan. Olarmen áńgime barysynda Qasym-Jomart Toqaev búkil el boıynsha áleýmettik kásipkerliktiń baǵytyn damytý qajettigin, memleket bul máseleni sheshetinin, ıaǵnı damýǵa jaǵdaı jasaıtynyn atap ótti.

Sondaı-aq, kásipker kezdesý barysynda Memleket basshysyna áleýmettik kásipkerlerdiń problemalaryn kóterdi. Kásipkerdiń aıtýynsha, mundaı eki másele bar: tıisti ǵımarat pen áleýmettik kásipkerler úshin biryńǵaı saýda núkteleriniń bolmaýy. Memleket mundaı jumystardyń áleýmettik baǵdaryn eskere otyryp, jeńildetilgen sharttarmen úı-jaılardy bere alady. Sondaı-aq, áleýmettik kásipkerlerdiń kásipornynda shyǵarylatyn ónimderge arnaıy saýda núktelerin uıymdastyrýǵa bolady. E Áskerov atap ótkendeı, Prezıdent Q.Toqaev kásipkerlerdiń ótinishterine oń jaýap qaıtaryp, bul másele qaralatynyna ýáde bergen.

Eske salsaq, Memleket basshysy Qasym-Jomart Toqaev áleýmettik kásipkerlik ókilderimen kezdeskeni týraly buǵan deıin habarlaǵan bolatynbyz.