Prezıdent: álem Qazaqstanǵa zor senim artady, bizdi «orta derjava» retinde tanıdy

ASTANA. KAZINFORM — Qytaı, Reseı, AQSh, EO, Taıaý Shyǵys, Azııa elderimen jáne basqa da memlekettermen iri ınvestıtsııalyq jobalardy júzege asyrý barysyn aıryqsha nazarda ustaǵan durys. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.

- Álem Qazaqstanǵa zor senim artady, bizdi «orta derjava» retinde tanıdy. Alaıda bul joǵary mártebe tek syrtqy saıasattaǵy naqty nátıjelermen ǵana emes, ekonomıka, ınvestıtsııa, ǵylym jáne tehnologııa salalaryndaǵy jetistiktermen de bekitilýge tıis, - dedi Qasym-Jomart Toqaev.

Prezıdenttiń aıtýynsha, qazirgi geosaıası jaǵdaı kórshilermen (Ortalyq Azııa jáne EAEO elderimen) yntymaqtastyqty jańa deńgeıge kóterýdi qajet etedi. Bul aımaqtyń jáne Qazaqstannyń básekege qabiletin kúsheıtedi.

- Úkimet ónerkásip, kólik jáne logıstıka, ІT sektor, agroónerkásip kesheni jáne basqa da salalardaǵy ózara tıimdi baılanystar boıynsha naqty sharalar ázirleýi kerek. Budan bólek, Qytaı, Reseı, AQSh, EO, Taıaý Shyǵys, Azııa elderimen jáne basqa da memlekettermen iri ınvestıtsııalyq jobalardy júzege asyrý barysyn aıryqsha nazarda ustaǵan durys, - dedi Memleket basshysy.

Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Otyrys barysynda Prezıdent Úkimetke Astana áýejaıyndaǵy avıakerosınniń baǵasyn retteýdi tapsyrdy.