Prezıdent álem chempıony atanǵan qazaqstandyq semserlesýshilerdi quttyqtady
ASTANA. KAZINFORM – Memleket basshysy Qasym-Jomart Toqaev semserlesýden Qazaqstan erler quramasyn Gonkongta ótken álem chempıonatyndaǵy tarıhı jeńisimen quttyqtady, dep habarlaıdy Prezıdent keńesshisi – Baspasóz hatshysy Aıbek Smadııarov.
Prezıdent quttyqtaýynda bul jeńistiń Qazaqstan semserlesý tarıhyndaǵy alǵashqy álem chempıondyǵy ekenin atap ótti.
– Semserlesýden Qazaqstan erler quramasynyń el tarıhyndaǵy tuńǵysh altyn medali – sporttyq sheberliktiń, bolattaı berik minez ben komandalyq rýhtyń aıqyn kórinisi, – delingen quttyqtaýda.
Qasym-Jomart Toqaev jeńimpazdar men jattyqtyrýshylar quramyna Qazaqstannyń álemdik arenadaǵy bedelin arttyrýǵa qosqan úlesi úshin shynaıy alǵys aıtyp, aldaǵy ýaqytta da tolaıym tabys pen jańa jeńister tiledi.
Aıta keteıik, buǵan deıin Qazaqstan quramasy semserlesýden álem chempıony bolǵany habarlandy.
