Prezıdent álem chempıonatynda úzdik nátıje kórsetken jas dzıýdoshylardy quttyqtady
ASTANA. KAZINFORM – Memleket basshysy qazaqstandyq dzıýdoshylardy jastar arasyndaǵy álem chempıonatynda tabysty óner kórsetýimen quttyqtady. Bul týraly Aqorda habarlady.
Qasym-Jomart Toqaev Ekvadordyń Gýaıakıle qalasynda ótip jatqan dzıýdodan jastar arasyndaǵy álem chempıonatynda Qazaqstan quramasyn aralas komandalyq jarystaǵy aıtýly jeńisimen, al Ǵabıt Rasýlhandy, Fatıma Supyǵalıevany, Ádiljan Jaýdınovti jekelegen synda altyn medalǵa ıe bolýymen quttyqtady.
Prezıdent jas chempıondardyń sporttaǵy joly jarqyn bolýyna jáne jańa bıikterdi baǵyndyra berýine tilektestik bildirdi.
Qazaqstandyq dzıýdoshylar álem birinshiliginde 4 altyn, 3 kúmis jáne 4 qola – barlyǵy 11 medal jeńip alyp, otandyq dzıýdo tarıhyndaǵy úzdik nátıjege qol jetkizdi.
Keshe keshkisin Qasym-Jomart Toqaev Halyqaralyq dzıýdo federatsııasynyń prezıdenti Marıýs Vızermen sóılesti.
Uıym jetekshisi Memleket basshysyn balýandarymyzdyń álemdik jastar týrnırindegi buryn-sońdy bolmaǵan biregeı jeńisimen quttyqtady.
Qasym-Jomart Toqaev Qazaqstannyń Týrızm jáne sport mınıstrligimen, sondaı-aq ulttyq federatsııamen syndarly yntymaqtastyq ornatqany úshin halyqaralyq uıymnyń basshysyna rızashylyǵyn bildirip, sonyń nátıjesinde elimizde dzıýdo kúresi keńinen damyp kele jatqanyna toqtaldy.
Qazaqstan quramasy dzıýdodan Ekvadorda ótken jasóspirimder arasyndaǵy álem chempıonatynyń aralas-komandalyq jarysynda jeńimpaz atanyp, tarıhı nátıjege qol jetkizgenin jazǵan edik.
Fatıma Supyǵalıeva Qazaqstan tarıhynda dzıýdodan qyzdar arasynda tuńǵysh álem chempıony atandy.
