Prezıdent: Aldymyzda turǵan mindet – munaı-gaz salasynda qosylǵan quny joǵary klasterler qurý

Memleket basshysy Qasym-Jomart Toqaev elordada ótip jatqan XV KazEnergy Eýrazııalyq forýmyna qatysýshylarǵa quttyqtaý joldady. Prezıdent quttyqtaýyn Energetıka mınıstri Almasadam Sátqalıev oqyp berdi, dep habarlaıdy QazAqparat tilshisi.

«Qazirgi jahandyq energetıka mańyzdy klımattyq jáne geosaıası qıyndyqtarǵa tap bolyp otyr. Bul energetıkalyq qaýipsizdiktiń, turaqty energııa jetkizý tizbeginiń jáne «jasyl» tehnologııanyń mańyzdylyǵyn kórsetedi. Qazaqstan eksporttyq baǵyttardy, sondaı-aq qajetti kóliktik-logıstıkalyq ınfraqurylymdy belsendi damyta otyryp, álemdik naryqqa energııa resýrstaryn senimdi jetkizýshi retinde ózin tanytty», - dep atap ótedi Memleket basshysy.

Prezıdenttiń atap ótýinshe, otyn-energetıka kesheni elimizdiń údemeli ilgerileýiniń basty qozǵaýshy kúshteriniń biri sanalady. Sala aýqymdy sheteldik ınvestıtsııalar men jańa tehnologııalardy tartady.

«Sonymen birge biz ekonomıkany dáıekti ártaraptandyrýǵa erekshe nazar aýdaramyz. Bizdiń aldymyzda turǵan mindet - serpindi jobalardy, onyń ishinde munaı men gazdy tereń óńdeý salasyndaǵy jobalardy iske asyrý arqyly qosylǵan quny joǵary klasterlerdi qurý. Elimiz taza jáne jańartylatyn energııa kózderine ınvestıtsııalar tartý úshin qolaıly jaǵdaılar jasady jáne 2060 jylǵa qaraı kómirtegi beıtaraptyǵyna qol jetkizý strategııasyn qabyldady. 2030 jylǵa qaraı eldiń energııa teńgerimindegi jańartylatyn energııa kózderiniń úlesi keminde 15 paıyzdy quraýy tıis. Búgingi forým men Qazaqstannyń energetıkalyq aptalyǵy barysynda qatysýshylar ıdeıalarymen almasyp, energetıkalyq sektordy odan ári damytýdyń jańa tásilderin ázirleıtinine senimdimin», - dedi Qasym-Jomart Toqaev.