Prezıdent aldaǵy úsh jylǵa arnalǵan bıýdjet týraly zańdy maquldady
ASTANA. KAZINFORM – Aqorda Prezıdenttiń aldaǵy úsh jylǵa arnalǵan bıýdjet týraly zańǵa qol qoıǵanyn habarlady.
- Memleket basshysy «2026 – 2028 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna qol qoıdy, - delingen qujatta.
Zańnyń mátini baspasózde jarııalanady.
Senatorlar respýblıkalyq bıýdjet jobasyna 76 túzetý engizdi.
Óńirlerge arnalǵan sýbventsııalar kólemi 17,5 mlrd teńgege ulǵaıtyldy. Buǵan qosa, 2026 jyly óńirlerdi damytýǵa 28,5 mlrd teńge baǵyttalady. Bul qarajat jylý jáne elektr energetıkasy, gazben jabdyqtaý, jaǵalaýdy nyǵaıtý jumystary jáne basqa da baǵyttardy qamtıdy.
Qosymsha qarjylandyrý kózderiniń qatarynda Úkimettiń rezervi jáne qaryzdy óteý shyǵyndary esebinen bosatylǵan qarajat kórsetilgen. Sonymen qatar 79 mlrd teńge memlekettik organdar arasynda, al 73,4 mlrd teńge bir vedomstvonyń bıýdjet baǵdarlamalary ishinde qaıta bólindi.
2026-2028 jyldarǵa arnalǵan jalpy sıpattaǵy transfertter týraly zańǵa sáıkes, jergilikti bıýdjetter kiristeriniń boljamy tómendegideı:
• 10,7 trln teńge — 2026 jyly,
• 12,1 trln teńge — 2027 jyly,
• 13,3 trln teńge — 2028 jyly.
Shyǵystar deńgeıi tıisinshe 14,9 trln, 17,3 trln jáne 18,7 trln teńge kóleminde boljanýda.
Transfertterdi esepteý kezinde Úkimet maqsatty sıpattaǵy aǵymdaǵy transfertterdi, sondaı-aq AÓK-ti sýbsıdııalaýǵa, sý únemdeý tehnologııalaryn engizýge, jańa nysandardy ustaýǵa jáne basqa da baǵyttarǵa arnalǵan qarajatty eskergen. Olardyń kólemi:
• 1,5 trln teńge — 2026 jyly,
• 1,6 trln teńge — 2027 jyly,
• 1,7 trln teńge — 2028 jyly.
2026 jylǵa arnalǵan sýbventsııalar 5,2 trln teńge, al alynatyn qarajat 879,9 mlrd teńge mólsherinde belgilendi.
Úkimettiń baǵalaýynsha, jergilikti bıýdjetterdiń respýblıkalyq bıýdjetten transfertterge táýeldiligi 50,7%-dan 33%-ǵa deıin tómendeıdi.
Respýblıkalyq bıýdjettiń boljamdy túsimderi 2026 jyly 19,2 trln teńgeni (JІÓ-ge shaqqanda 10,5%) quraıdy, al 2028 jyly 23,2 trln teńgege (20,8%) deıin ósedi. Ulttyq qordan bólinetin kepildendirilgen transfert jyl saıyn 2,77 trln teńge kóleminde belgilengen, ol munaıdyń shekti baǵasyna negizdelgen lımıtter aıasynda aıqyndalǵan.
Respýblıkalyq bıýdjet shyǵystary mynadaı kólemde aıqyndaldy:
• 27,7 trln teńge — 2026 jyly (JІÓ-ge shaqqanda 15,1%),
• 28,8 trln teńge — 2027 jyly (14%),
• 29,8 trln teńge — 2028 jyly (13%).
Barlyq parametrler bıýdjet erejelerin eskere otyryp qalyptastyrylǵan.
Sonymen qatar Prezıdent 2026-2028 jyldarǵa arnalǵan respýblıkalyq jáne oblystyq bıýdjetter, respýblıkalyq mańyzy bar qalalar men astana bıýdjetteri arasyndaǵy jalpy sıpattaǵy transfertter kólemderi týraly zańǵa qol qoıdy.
Aıta keteıik, 2026 jyly AEK, járdemaqy jáne aıyppuldar qalaı ózgeretinin mynaý siltemeden oqı alasyzdar.