Prezıdent Alataýdy jańa tehnologııalar tartý ortalyǵyna aınaldyrý mindetin qoıdy
ASTANA. KAZINFORM – Jańa Konstıtýtsııaǵa memleketimizdiń ınvestıtsııalyq qýatyn kúsheıtýge arnalǵan naqty normalar qosyldy. Bul týraly Prezıdent Qasym-Jomart Toqaev elordada «Ákimshilik ádilet jáne onyń quqyq ústemdigin qamtamasyz etýdegi róli» atty halyqaralyq forýmda aıtty.
Degenmen Memleket basshysy bosańsýǵa bolmaıtynyn, tabandy jumys istep, budan da bıik belesterge umtylý kerektigin aıtty. Buǵan elimizdiń áleýeti tolyq jetedi.
– Atap aıtqanda, jańa Konstıtýtsııaǵa memleketimizdiń ınvestıtsııalyq qýatyn kúsheıtýge arnalǵan naqty normalar qosyldy. Sonyń ishinde qarjy salasyna jáne «qarqyndy damıtyn qalalarǵa» arnaýly quqyqtyq rejım engizý týraly sheshim qabyldandy.
Barshańyzǵa málim, men jaqynda «Alataý qalasynyń arnaýly quqyqtyq rejımi týraly» konstıtýtsııalyq zańǵa qol qoıdym. Bul mańyzdy qujatta «aqyldy qalaǵa» tán derbes ekojúıe qalyptastyrýdyń quqyqtyq negizi bekitildi, - dedi Q. Toqaev.
Arnaıy quqyqtyq rejım memlekettik basqarý múmkindikterin keńeıtýdi, sonyń ishinde sot júıesiniń erekshe jumys isteýin qamtamasyz etedi.
– Aldyńǵy qatarly retteý quraldary úzdik álemdik tájirıbeni engizýge, ozyq ınnovatsııalyq sheshimderdi synaqtan ótkizýge jáne osy biregeı jobany júzege asyrý úshin barlyq qajetti jaǵdaıdy jasaýǵa múmkindik beredi. Bizdiń basty maqsatymyz – Alataý qalasyn bolashaqtyń tsıfrlyq aglomeratsııasyna, jańa tehnologııalardy tartý ortalyǵyna aınaldyrý. Memleket bıznes ókilderimen ashyq, ózara tıimdi yntymaqtastyqqa daıyn, - dedi el Prezıdenti.
Aıta keteıik, elordada Memleket basshysynyń qatysýymen eldegi ákimshilik ádiletke arnalǵan forým ótti.
Buǵan deıin Prezıdent ınvestıtsııalyq daýlardyń 80%-y ınvestorlar paıdasyna sheshilgenin aıtqan edi.
