Prezıdent Alataýdy damytýǵa bıýdjet qarjysyn turaqty baǵyttaýdy tapsyrdy
QONAEV. KAZINFORM – Alataýǵa memlekettik kepildikpen qaryz alý quqyǵyn berý usynyldy. Bul týraly Aqordanyń baspasóz qyzmeti habarlady.
Qasym-Jomart Toqaev Úkimet bastapqy kezeńde qalanyń negizgi ınfraqurylymyn damytý maqsatynda turaqty túrde qarjy bólip otyrýy kerek ekenin aıtty.
— Jalpy, mundaı ınvestıtsııalyq tásil — ábden oryndy jáne oıǵa qonymdy. Memleket ınfraqurylymǵa ınvestıtsııa salsa, jeke kapıtal da kele bastaıdy. Sonyń arqasynda salyq túsimi artady, jańa ınfraqurylym paıda bolady. Osylaısha, qolǵa alynǵan jumystyń aýqymy keńeıe beredi, — dedi Prezıdent.
Qasym-Jomart Toqaev bıýdjet qarjysy tek ınvestıtsııalyq maqsatqa saı jumsalýǵa tıis ekenin aıtty.
— Al negizgi ınfraqurylymǵa bastapqy ınvestıtsııa salý mindeti tek jeke sektorǵa ǵana júktelse, jobalardyń ınvestıtsııalyq tartymdylyǵy álsireıdi. Mundaı jaǵdaı tarıfi joǵary monopolııa qurylymdarynyń paıda bolýyna ákep soqtyrady jáne aqyr sońynda damýdy tejeıdi.
Sondyqtan Úkimet bastapqy kezeńde qalanyń negizgi ınfraqurylymyn damytý maqsatynda turaqty túrde qarjy bólip otyrýy kerek. Basqa jol joq. Qajet bolsa, ornyqty kiris qory qalyptasqansha Alataýǵa qosymsha lımıtterdi jáne memlekettiń kepildigimen qaryz alý quqyǵyn berýge bolady. Degenmen bıýdjet qarjysy tek ınvestıtsııalyq maqsatqa saı jumsalýǵa tıis. Qalanyń uzaqmerzimdi damý baǵdary basty nazarda bolýy kerek, — dedi ol.
Aıta ketelik Memleket basshysy ınvestorlarǵa barynsha jaıly jaǵdaı jasalýǵa tıis jáne olarǵa joǵary deńgeıde qyzmet kórsetýdi asa mańyzdy mindet retinde atady.
