Prezıdent Alataý qalasyna arnaýly mártebe berý týraly Jarlyqqa qol qoıdy

ASTANA. KAZINFORM — Memleket basshysy Alataý qalasyna arnaýly mártebe berý týraly Jarlyqqa qol qoıdy. Bul týraly Aqorda málim etti. 

Prezıdent Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynan:

«Alataý qalasy elimizdiń jańa iskerlik jáne ınnovatsııalyq ortalyǵy bolýǵa tıis»

— Qarqyndy ósip kele jatqan kóptegen memlekette damý kóshiniń basynda júretin qalalar ınvestıtsııalar men tehnologııalardy ózine tartatyn polıýske aınalǵan. Alataý qalasy elimizdiń jańa iskerlik jáne ınnovatsııalyq ortalyǵy bolýǵa tıis. Jalpyulttyq mańyzy bar osy jobany júzege asyrý úshin arnaıy jer bólindi, bastapqy josparlaý jumysy aıaqtaldy, ınfraqurylymnyń negizgi jelileri qosyldy.

Jaqynda Qytaıǵa barǵan saparymda álemniń jetekshi kompanııalarymen quny mıllıardtaǵan qarjy turatyn kelisimder jasaldy. Shenchjen jahandyq tehnopolısin salýǵa qatysqan sondaı kompanııanyń biri endi Alatau City jobasyn júzege asyrýǵa tikeleı atsalysady.

Kelesi qadam — Alatau City-diń myqty ınstıtýtsıonaldyq negizderin qalyptastyrý.

Sodan keıin jarty jyldan asyrmaı, jeke zań qabyldaý qajet. Qujatta qalany basqarý rejımi, onyń qarjylyq modeli jáne basqa da mańyzdy máseleler qamtylýǵa tıis.

Arnaıy quqyqtyq mártebe — qalaǵa beriletin artyqshylyq emes, jobanyń qaǵaz júzinde qalyp qoımaı, naqty iske asýyna qajetti shara nemese qural ekenin aıta ketken jón.

Alatau City aımaqtaǵy tolyq tsıfrlanǵan alǵashqy qalaǵa aınalýǵa tıis. Munda Smart City tehnologııalaryn qoldanýdan bastap taýarlar men qyzmet aqysyn krıptovalıýtamen tóleýge deıingi jańalyqtyń barlyǵy engizilýi kerek.

Bul qala Qazaqstannyń keleshektegi kelbetin tanytpaq. Onda tehnologııalyq órleýge jáne ómir súrýge barynsha qolaıly jaǵdaı úılesim tabýy qajet, — delingen Joldaýda.

Aıta keteıik, Alataý qalasynda 73 mlrd teńgege kólik-logıstıka ortalyǵy salynady.