Prezıdent alańdaýshylyq bildirgen Qostanaıdaǵy qazaqtildi bastaýysh mektep qashan ashylady

QOSTANAI. QazAqparat – Búgin oblys ákimi Arhımed Muhambetov Qostanaı qalasynda jańadan boı kótergen № 28 mektep-gımnazııasyna bardy. Bul týraly óńir basshysy Instagram-paraqshasynda jazdy, dep habarlaıdy QazAqparat.

Memlekettik tilde oqytatyn 900 oryndyq mektep, osy jyldyń 4 qarashasynda ashylady. Aıta ketsek, bul jerde buryn kolledj ǵımaraty bolǵan. Endi ol Qostanaı oblysy ákimdigi bilim bóliminiń teńgerimine berildi.

«Mektepti jóndeýge jáne jaraqtandyrýǵa 250 mln teńgeden astam qarajat bólindi: jergilikti bıýdjetten - 160 mln teńge jáne demeýshilik qarajat – 94,7 mln teńge. Jalpy, ǵımarattyń shatyryn, jylytý jáne sýmen jabdyqtaý júıelerin, 3 qabatty jóndeýge, sondaı-aq qasbet boıynsha jumystarǵa 200 mln teńge jumsaldy. Al qazirgi zamanǵy jabdyqtarmen jaraqtandyrýǵa 60 mln teńge baǵyttaldy. Mektepti belgilengen merzimde ashýdy tapsyrdym», - dep jazdy Arhımed Muhambetov.

Búgingi kúni hımııa, fızıka, bıologııa jáne robototehnıka kabınetteri tolyq jóndelgen. Sonymen qatar ashanalyq, mýzykalyq jáne sport jabdyqtary, synyptarda jańa jıhazdar ornatyldy.

Aıta keteıik, Memleket basshysy Qasym-Jomart Toqaev bıylǵy shilde aıynda Qostanaıda qazaq tilinde bilim beretin jalǵyz bastaýysh mektebiniń kúrdeli jaǵdaıyna alańdaýshylyq bildirgen bolatyn.

«Jergilikti turǵyndardyń pikirine qaraǵanda, Qostanaıdaǵy qazaq tilinde bilim beretin mektepke qatysty kúrdeli jaǵdaı qalyptasyp otyr. Bilim mınıstri jáne oblys ákimi barlyq máseleni jańa oqý jylyna deıin sheshýi tıis», - dep jazǵan bolatyn Prezıdent Twitter-degi paraqshasynda.

Keıin osy máselege qatysty oblystyq Óńirlik kommýnıkatsııalar qyzmetinde qala ákimi Qaırat Ahmetovtiń qatysýymen brıfıng ótti.

«Internette shyndyqqa sáıkes kelmeıtin málimetter tarap jatyr. Negizi, másele jańa qazaq mektebin kóshirýden bastaldy. Bul jerde shý kóterip otyrǵan jurtshylyq durys túsinbegen. Biz mektepti jabý emes, ony basqa mekenjaıǵa kóshirý týraly usynys aıttyq. ıAǵnı, bastaýysh mektepti Jeńis-Borodın kósheleri qıylysynda ornalasqan kolledjge kóshirý týraly bastama kóterildi. Ata-analardyń pikiri eskerilip, bastaýysh mektep óz ornynda qalatyn boldy. Sondyqtan, BAQ ókilderine resmı aqparatty ǵana taratýdy suraımyz», - degen edi Qaırat Ahmetov.