Prezıdent «ALACEM» tsement zaýytynyń jumysymen tanysty
Memleket basshysy Qasym-Jomart Toqaev Jetisý óńirindegi iri óndiris oshaqtarynyń biri sanalatyn «ALACEM» tsement zaýytyn aralap kórdi, dep habarlaıdy Kazinform.
2020 jyly ındýstrııalandyrý baǵdarlamasy aıasynda iske qosylǵan Qazaqstan-Sıngapýr birlesken kásipornynda qurǵaq ádispen jylyna 1,5 mıllıon tonna tsement óndiriledi. Joba quny – 47 mıllıard teńge. Zaýytta, negizinen, azamattyq jáne óndiristik nysandar qurylysynda keńinen paıdalanylatyn M400, M450, M500 markaly tsement túrleri shyǵarylady. Mysaly, Úlken Almaty ózenine salynǵan «Aıýsaı» bógetiniń qurylysyna osy zaýyttyń ónimi qoldanylǵan.
Kásiporynnyń basqarýshy dırektory Stanıslav Şerbakovtyń aıtýynsha, zaýyt Almaty qalasynyń, Jetisý jáne Almaty oblystarynyń tsement ónimine degen suranysyn 65 paıyzǵa deıin qamtamasyz etedi. Jobany júzege asyrý barysynda ekologııalyq taza, qaldyqsyz óndiris standarttaryna saı keletin ozyq tehnologııalar qoldanylǵan. Sondaı-aq ónim protsesin basqarý úshin DCS ıntellektýaldy júıesi engizilgen.
Kásiporynnyń óndiris jáne kólik-logıstıkalyq ýchaskelerinde 600 adam jumys isteıdi. Olardyń basym bóligi – jergilikti turǵyndar. Sonymen qatar ónimdi ótkizý, dılerlik jeliler arqyly qosymsha 200-ge jýyq jumys orny ashyldy.
Kompanııa zaýytty iske qosqaly beri bıznestiń áleýmettik jaýapkershiligi aıasynda Kerbulaq aýdanynyń damýyna 2,7 mıllıard teńge qarjylaı qoldaý kórsetken. Bul qarajat Saryózek – Kóktal jolyn jóndeýge jáne aýdandaǵy áleýmettik jobalarǵa jumsaldy.
Memleket basshysy zaýyt jumysshylarymen áńgimelesip, osyndaı iri óndiristiń ashylýy qurylys ındýstrııasyn damytý, ásirese, jergilikti ınfraqurylymdy jetildirý úshin mańyzdy ekenin atap ótti.
Buǵan qosa kompanııa quryltaıshylary elimizde júzege asyrylyp jatqan ınvestıtsııalyq jobalardyń aýqymyn keńeıtip jatyr. Atap aıtqanda, 2021 jyly Abaı oblysynyń Jarma aýdanyndaǵy «Qazaqtsement» kásipornyn satyp alyp, modernızatsııa jasaý arqyly 450 jumys ornyn ashqan. Sonymen qatar taıaý jyldary Jambyl oblysy Qordaı aýdanynda taǵy bir tsement óndirý zaýyty iske qosylmaq. Zaýyt ónimi kórshiles Qyrǵyzstan men Ózbekstan memleketterine eksporttalady.
