Prezıdent «Ál-Azhar» ýnıversıteti Joǵarǵy ımamynyń orynbasarymen kezdesti
ASTANA. KAZINFORM – Memleket basshysy «Ál-Azhar» ýnıversıteti Joǵarǵy ımamynyń orynbasary Muhammed Abdýrahman Ál-Dýaınımen kezdesý barysynda meımanǵa iltıpat tanytyp, Álemdik jáne dástúrli dinder kóshbasshylarynyń VIII sezine qatysý úshin Astanaǵa kelgenine rızashylyǵyn bildirdi. Bul týraly Aqordanyń baspasóz qyzmeti habarlady.
Qasym-Jomart Toqaev «Ál-Azhar» ustanymdary elimizdiń beıbitshilik saıasatyna tolyq saı keletinine, onyń bastamalary jalpy adamzat órkenıetiniń birligin nyǵaıta túsetinine toqtaldy.
Memleket basshysynyń pikirinshe, Astanada ótip jatqan Sezd – Qazaqstannyń dinaralyq kelisimdi nyǵaıtý jolyndaǵy tabandy saıasatynyń kórinisi. Al dinı kóshbasshylardyń basqosýy – jaı ǵana kezdesý emes, naqty sheshimder qabyldanatyn mańyzdy platforma.
Muhammed Abdýrahman Ál-Dýaını «Ál-Azhar» ýnıversıtetiniń Joǵarǵy ımamy sheıh Ahmet at-Taıebtiń izgi sálemin jetkizip, Sezdiń álemde beıbitshilikti ornyqtyrýǵa qosqan úlesin joǵary baǵalady.