Prezıdent Aqushtap Baqtygereevanyń 80 jyldyq mereıtoıyna oraı quttyqtaý joldady
ASTANA.KAZINFORM - Búgin Astanada Qazaqstannyń eńbek sińirgen qaıratkeri, QR Memlekettik syılyǵy jáne «Qurmet», «Otan» ordenderiniń ıegeri Aqushtap Baqtygereevanyń 80 jyldyq mereıtoıyna arnalǵan is-shara ótti.
Mádenıet jáne aqparat mınıstrliginiń málimetinshe, oǵan QR Parlamenti Senatynyń tóraǵasy Máýlen Áshimbaev, QR Parlamenti Májilisiniń tóaǵasy Erlan Qoshanov, QR Mádenıet jáne aqparat mınıstri Aıda Balaeva qatysty. Іs-sharada Aıda Balaeva Prezıdent Qasym-Jomart Toqaevtyń quttyqtaý hatyn oqyp berdi.
«Halqymyz ózińizdi mádenıetimiz ben ónerimizdi órkendetýge úles qosyp kele jatqan qarymdy qalamger, kórnekti qoǵam qaıratkeri retinde jaqsy biledi jáne qurmetteıdi. Eńbek jolynda birqatar otandyq gazet-jýrnaldar men baspada jemisti jumys jasap, ulttyq ádebıetimizdiń ilgeri basýyna kúsh-qaıratyńyzdy jumsadyńyz. Qazaq poezııasyna ózindik órnegińizben kelip, aıshyqty oılar men aıryqsha dara shýmaqtaryńyzben tanyldyńyz. Elimizdiń mártebesin asqaqtatqan Táýelsizdik pen beıbit ómirdi jáne tabıǵat sulýlyǵyn arqaý etken jalyndy jyrlaryńyzdy talǵamy bıik oqyrman jyly qabyl aldy. Sonymen qatar, otbasy qundylyqtary, qyz balanyń tárbıesi, ananyń qoǵamdaǵy róli týraly paıymdy pikirlerińiz qoldaý taýyp keledi. Aldaǵy ýaqytta el-jurttyń ortasynda syı-qurmetke bólenip, shyǵarmashylyq izdenisterińiz tabysty bola berýine tilektespin. Sizge myqty densaýlyq jáne otbasyńyzǵa baq-bereke tileımin!», – delingen quttyqtaý hatta.
Óz sózinde Aıda Balaeva aqyndy mereıli jasymen quttyqtap, qalamger shyǵarmashylyǵynyń urpaq tárbıesi, jastardyń boıyna rýhanı qundylyqtardy sińirýge zor úles qosqanyn atap ótti.
«Prezıdent atap ótkendeı, qazaq ádebıetinde Aqushtap Baqtygereevanyń ózindik órnegi, oryny bólek. Sebebi aqyn apamyzdyń óleńderi ár qazaqtyń júregine jaqyn. Onyń poezııasy erekshe syrshyldyqpen, sezimtaldyqpen órilgen. Qalamgerdiń qazaq áıeliniń beınesin asqaqtatqan biregeı týyndylaryn erekshe atap ótkim keledi. El anasy, ult tárbıesiniń janashyry retinde qundylyqtarymyzdy qasterleýge, qazaq qyzdaryna parasat pen tárbıe nárin sińirýge zor úles qosyp keledi», – dedi A.Balaeva.
Sondaı-aq, mınıstr mereıtoıǵa oraı túrli is-sharalar, ádebı keshter uıymdastyrylyp jatqanyn aıtty. Atap aıtsaq, keshe aqyn mereıtoıyna oraı Qazaq ulttyq óner ýnıversıtetinde ádebı-sazdy keshi bolyp ótti. Al, búgin Q.Qýanyshbaev atyndaǵy qazaq ulttyq-mýzykalyq teatrynda Batys Qazaqstan oblystyq Hadısha Bókeeva atyndaǵy qazaq drama teatry Aqushtap Baqtygereeva men dramatýrg Mádına Omarovanyń stsenarıimen ázirlengen «Juban» poetıkalyq dramasy sahnalandy.
QR Ulttyq akademııalyq kitaphanasynda «Alashtyń Aqushtaby» atty ádebı kezdesý ótkizildi. Kezdesýde aqynnyń «Meniń Farızam» atty jańa kitabynyń tusaýkeseri ótkizildi. Aqyn bul kitabynda qazaq áıelderi arasynan shyqqan biregeı qalamger Farıza Ońǵarsynovanyń ómir joly týraly syr shertedi. Sonymen qatar L.Gýmılev atyndaǵy Eýrazııa Ulttyq ýnıversıtetinde Aqushtap Baqtygereevanyń oqyrmandarmen kezdesýi uıymdastyryldy.
