Prezıdent Aqtóbedegi jumys saparyn qorytyndylady

AQTÓBE. QazAqparat - Qazaqstanda jumys istegen adam jaman turmaıdy. Bul týraly Aqtóbege ekikúndik jumys saparyn qorytyndylaǵan Memleket basshysy Nursultan Nazarbaev aıtty, dep habarlaıdy QazAqparat tilshisi.

Elbasy «Ásem» bilim berý-saýyqtyrý ortalyǵyn aralap kórgennen keıin oblysta atqarylyp jatqan jumystarǵa baǵasyn berdi.

«Aqtóbe oblysyna saparym aıaqtaldy. Ýaqyttyń tyǵyzdyǵyna baılanysty aýdandarǵa bara almaı, tek qalany araladym. Kórgenim jaqsy áser qaldyrdy. Oblysta Joldaýdaǵy tapsyrmalar oryndalýda. «7-20-25» baǵdarlamasy aıasynda turǵyn úı qurylysy júrip jatyr. Alǵashqy páterler berildi. Sporttyq, mádenı nysandar salynýda. Ekonomıkalyq damý bar, 5 paıyzdyq ósim jaqsy kórsetkish. Oftalmologııalyq ortalyqta bolyp, adamdarmen kezdestim, olardyń kóńil-kúıin bildim. Atqarýshy bıliktiń jumysyna oń baǵa beremin. Aqtóbege jyl saıyn kelip, kezdesip turamyn. Oblysta kóp jumys atqarylyp jatyr. Adam ómiriniń jaqsy bolýy memlekettiń ekonomıkasyna baılanysty. Gaz bar, úı qurylysy júrip jatyr. Aldaǵy ýaqytta ishki jol salynady. Degenmen, kemshilikter de bar. Joldaýda aıtylǵan tapsyrmaǵa saı eń tómengi jalaqy 1,5 ese kóbeıedi, adamdardyń jaǵdaıy túzeledi. Barlyǵy túzelýi úshin jumys isteýimiz kerek. Qazaqstanda jumys istegen adam jaman turmaıdy», - dedi Prezıdent Nursultan Nazarbaev.

Eske salsaq,  keshe Memleket basshysy Aqtóbege jumys saparymen keldi. «Aıala» balalardy saýyqtyrý ortalaǵyna baryp, «Baqytty bala» jobasy aıasynda iske asyrylǵan jumystarmen tanysty. Sonymen qatar Tennıs ortalyǵyna bardy.   

Óńirdiń ekonomıkalyq-áleýmettik damý kórsetkishterimen tanysqan Elbasy Aqtóbe oblysynyń damýyna oń baǵasyn berdi. 

Al búgin Prezıdent Energııa tıimdiligi ortalyǵynda boldy. Onda Aqtóbe qalasynyń ákimi Nursultan Nazarbaevqa oblys ortalyǵynyń damý barysy, sondaı-aq Aqtóbe aglomeratsııasyn, «SmartCity Aqtóbe» júıesin jáne qalanyń qoǵamdyq keńistigin qurý jóninde berilgen tapsyrmalardyń oryndalýy týraly málimdedi.