Prezıdent aktıvterdi qaıtarý týraly: júgensizdikke jol berilmeýi tıis

ASTANA. KAZINFORM – Elden zańsyz shyǵarylǵan aktıvterdi qaıtarý ınvestıtsııanyń taǵy bir qaınar kózi bolýǵa tıis. Bul týraly Prezıdent Qasym-Jomart Toqaev Úkimettiń keńeıtilgen otyrysynda aıtty.

«Elden zańsyz shyǵarylǵan aktıvterdi qaıtarý ınvestıtsııanyń taǵy bir qaınar kózi bolýǵa tıis. Men bul sharýanyń baǵyt-baǵdary týraly birneshe ret aıtqan bolatynmyn. Bıznes ókilderimen kezdesýlerde de osy máselege toqtaldym. Ýákiletti qurylymdar jumysty jandandyrýy kerek. Túsken qarajatty elimiz úshin mańyzy zor jobalardy júzege asyrýǵa paıdalaný qajet», - dedi Memleket basshysy.

Alaıda, Prezıdent quqyq qorǵaý organdary da júgensizdikke jol bermeýge tıis ekenin de eske saldy.

«Taǵy da eskertemin, «shash al dese, bas alyp», asyra siltemeý kerek. Men mundaı jónsiz árekettiń qaı-qaısysyn da qatań aıyptaımyn. Bizdiń basty mindetimiz – kásipkerlerdiń erkindigin shekteý emes, kerisinshe, elimizde bızneske jáne ınvestıtsııaǵa jaıly orta qalyptastyrý. Bul jumystyń áleýmettik ádildikti qamtamasyz etý turǵysynan aıryqsha máni bar. Mańyzdy ekonomıkalyq mindetti oryndaýdy kózdeıtin osy bastamany eshkimniń joqqa shyǵarýyna jol berilmeıdi», - dedi Qasym-Jomart Toqaev.