Prezıdent Aqtaýdaǵy kóterme saýda-taratý ortalyǵyn aralap kórdi
AQTAÝ. KAZINFORM – Qasym-Jomart Toqaev Mańǵystaý oblysyna barǵan jumys sapary aıasynda Aqtaýdaǵy kóterme saýda-taratý ortalyǵyn aralap kórdi. Bul týraly Aqorda málim etti.
— Memleket basshysyna azyq-túlik qaýipsizdigin saqtaıtyn mundaı nysannyń aımaqta alǵash ret salynǵany jóninde baıandaldy. Atalǵan ortalyq óńirdi azyq-túlikpen qamtamasyz etý, tutynýshylarmen aradaǵy deldaldardy azaıtý jáne ónim baǵasyn tómendetý maqsatynda boı kótergen. Aýmaǵy 80 myń sharshy metr bolatyn keshende 40 myń tonna ónim saqtaýǵa bolady, — delingen habarlamada.
Jobany júzege asyrýǵa 5 mıllıard teńge ınvestıtsııa tartylǵan. Jyl sońyna deıin ortalyqtyń ekinshi kezeńin iske qosý josparlanǵan.
Qazirgi kezde ónim jetkizýmen aınalysatyn otandyq iri kásipkerlermen kelisimshart jasaý jumystary belsendi túrde júrgizilip jatyr.
Buǵan deıin habarlanǵandaı, Memleket basshysy jumys saparymen Mańǵystaý oblysyna bardy.