Prezıdent AQSh Saýda palatasy ókilimen kezdesti
ASTANA. KAZINFORM — Memleket basshysy AQSh Saýda palatasynyń Taıaý Shyǵys, Túrkııa jáne Ortalyq Azııa isteri jónindegi aǵa vıtse-prezıdenti Hýsh Choksıdi qabyldady. Bul týraly Aqorda málim etti.
Áńgimelesý barysynda Memleket basshysy Qazaqstannyń Prezıdent Donald Tramp Ákimshiligimen syndarly yqpaldastyqty nyǵaıta túsýge ázir ekenin rastady. Sondaı-aq Qazaqstan men AQSh arasyndaǵy saýda-ekonomıkalyq jáne ınvestıtsııalyq seriktestiktiń strategııalyq sıpatyna aıryqsha nazar aýdardy.
Prezıdent Qazaqstannyń amerıkalyq bıznes úshin qolaıly ınvestıtsııalyq klımat jasaýǵa beıil ekenin atap ótti.
— Qasym-Jomart Toqaev pen Hýsh Choksı yqpaldastyqty keńeıtý, sonyń ishinde asa mańyzdy mıneraldardy ıgerý, energetıka, tsıfrlyq ınfraqurylym, jasandy ıntellekt, ózara kólik baılanysy, ozyq tehnologııalar, aýyl sharýashylyǵy jáne qarjy qyzmetteri perspektıvasyn talqylady, — delingen habarlamada.
Hýsh Choksı baılanystardy odan ári damytý áleýetiniń joǵary ekenine toqtalyp, ózara qyzyǵýshylyq týdyrǵan birqatar salada birlesken jobalardy júzege asyrýǵa daıyn ekenin jetkizdi.
Buǵan deıin Memleket basshysy EQDB prezıdenti Odıl Reno-Bassony qabyldady.
Prezıdent VEON kompanııalar tobynyń bas atqarýshy dırektory Mýhterem Kaan Terzıoglýdy qabyldady. Kezdesý barysynda tsıfrlandyrý jáne jasandy ıntellekt tehnologııasyn engizý maqsattaryna saı telekommýnıkatsııa naryǵyn damytý perspektıvasy talqylandy. Memleket basshysy Qasym-Jomart Toqaev Qazaqstanda uzaq jyldan beri qyzmet etip kele jatqan VEON kompanııasynyń otandyq telekommýnıkatsııany jáne tsıfrlyq ekojúıeni órkendetýge qosqan úlesin joǵary baǵalady.
