Prezıdent AQSh sapary aıasynda 20-dan astam kezdesý ótkizdi
ASTANA. KAZINFORM — Prezıdenttiń Nıý-Iork qalasyndaǵy keshegi jumys kestesi joǵary deńgeıdegi mazmundy kezdesýlerge toly boldy. Bul týraly Prezıdenttiń Baspasóz hatshysy Rýslan Jeldibaı málim etti.
— Jalpy, sapar aıasynda Qasym-Jomart Toqaevtyń prezıdenttermen, premer-mınıstrlermen, mınıstrlermen, halyqaralyq uıymdardyń jáne kompanııalardyń jetekshilerimen 20-dan astam kezdesýi ótti, — delingen habarlamada.
Júzdesýlerde qarastyrylǵan máseleler aýyl sharýashylyǵy, bilim berý, sport, ınvestıtsııadan bastap jasandy ıntellektige deıingi kóptegen baǵytty qamtydy.
Elimizge mıllıardtaǵan dollar ınvestıtsııa tartý jóninde ýaǵdalastyqqa qol jetkizildi. Qazaqstan men AQSh-tyń iri kompanııalary arasynda 11 kelisim men memorandýmǵa qol qoıyldy. Kólik-logıstıka, energetıka jáne aqparattyq tehnologııalar sııaqty strategııalyq turǵydan mańyzdy salalardy qamtıtyn qujattarda el ekonomıkasyna 5,2 mıllıard dollar kóleminde ınvestıtsııa tartý kózdelgen.
Prezıdent Amerıkanyń iri kompanııalarynyń basshylarymen kelissóz júrgizdi.
Atap aıtqanda:
– PepsiCo qory dırektorlar keńesiniń tóraǵasy Stıven Kıhomen kezdesti. Álemge áıgili brend Almaty oblysynda snekter shyǵaratyn zaýyt qurylysyna kiristi. Investıtsııa kólemi — 368 mıllıon dollar;
— Amazon kompanııasynyń vıtse-prezıdenti Devıd Zapolskımen tsıfrlandyrý, baılanys jáne jasandy ıntellekt salalaryndaǵy yntymaqtastyqtyń jaı-japsaryn talqylady.
Amazon Kuiper kompanııasy Almaty, Aqkól jáne Aqtaý qalalarynda óziniń jerdegi ınfraqurylymyn jasaqtaýdy kózdeıdi. Jobaǵa 200 mıllıon dollarǵa jýyq ınvestıtsııa salý josparlanǵan. Nátıjesinde elimizdiń shalǵaı óńirleri jyldamdyǵy joǵary spýtnıktik ınternetke qol jetkizedi.
— Meta vıtse-prezıdenti ıAnn Lekýnmen jasandy ıntellektiniń damýy jáne qoldanylýy jóninde pikir almasty;
— Cerberus Capital Management atqarýshy dırektory Frenkom Brýnomen ınvestıtsııalyq múmkindikter talqylandy.
– Shevron korporatsııasynyń dırektorlar keńesiniń tóraǵasy jáne bas atqarýshy dırektory Maıkl Ýırtpen kezdesýde korporatsııanyń elimizdiń ekonomıkalyq damýyna eleýli úles qosqany atap ótildi. Táýelsizdik jyldary Shevron Qazaqstanǵa 55 mıllıard dollar ınvestıtsııa quıdy.
— Sondaı-aq ExonMobil kompanııasynyń basqarma tóraǵasy jáne bas atqarýshy dırektory Darren Výdspen;
— Álemdegi eń iri Blackstone ınvestıtsııalyq kompanııasynyń basqarma tóraǵasy Stıven Shvartsmanmen;
— Sitigroup kompanııasynyń bas atqarýshy dırektory Djeın Freızermen;
– Embraer kompanııasynyń prezıdenti Fransısko Gomes Netomen kezdesýler ótti.
Qasym-Jomart Toqaev Qazaqstan-AQSh bıznesiniń yntymaqtastyǵyn nyǵaıtý maqsatynda dóńgelek ústel otyrysyna qatysty. Prezıdent AQSh-tyń iri korporatsııa basshylarymen aqparattyq tehnologııa, energetıka, aýyl sharýashylyǵy, kólik jáne logıstıka salalaryndaǵy seriktestik máselesin talqylady.
Budan bólek, Memleket basshysy Prezıdent Donald Tramppen Qazaqstan men AQSh arasyndaǵy yntymaqtastyq, ekonomıka jáne saýda salalaryndaǵy yqpaldastyqty keńeıtý máselelerin talqylap, halyqaralyq ahýal jóninde pikir almasty.
Amerıka Prezıdenti Truth Social áleýmettik jelisindegi paraqshasynda Qazaqstan Prezıdentimen bolǵan áńgimelesýdi qorytyndylap, qol qoıylǵan kelisimderdiń mańyzyna toqtaldy. Sonyń biri — elimiz úshin jalpy quny 4 mıllıard dollar bolatyn 300 lokomotıv óndirisi.
Sodan soń Qasym-Jomart Toqaev BUU Bas Assambleıasynyń 80-shi sessııasy aıasynda BUU Bas hatshysy Antonıý Gýterrıshpen, Ýkraına Prezıdenti Vladımır Zelenskıımen, Chernogorııa Prezıdenti ıAkov Mılatovıchpen kezdesti.
Sonymen qatar Memleket basshysy AQSh úkimetiniń ókilderimen, atap aıtqanda, Saýda mınıstri Govard Latnıkpen, Saýda palatasynyń bas atqarýshy dırektory Sıýzann Klarkpen jáne AQSh Prezıdentiniń Ońtústik jáne Ortalyq Azııadaǵy arnaýly ókili Serdjıo Gormen eki el arasyndaǵy baılanystardy pysyqtady.
Eń sońynda Qasym-Jomart Toqaev Halyqaralyq fýtbol federatsııasynyń (FIFA) prezıdenti Djannı Infantınony qabyldap, otandyq fýtboldyń deńgeıin kóterý úshin birlesken jobalardy júzege asyrý múmkindikterin talqylady.
Atap óterlik jaıt, búgin BUU Bas Assambleıasynyń 80-shi sessııasy aıasyndaǵy kún tártibi de barynsha mazmundy ári belsendi bolmaq.
Aıta keteıik, Qasym-Jomart Toqaev BUU-nyń Nıý-Iorktegi debatynda TMD elderi basshylary arasynda birinshi bolyp sóz sóıleıdi.
Jibek Joly Prezıdenttiń sóz sóıleýin onlaın kórsetedi.