Prezıdent AQSh Memlekettik hatshysy Mark Rýbıomen jáne Donald Tramp Ákimshiliginiń basqa da ókilderimen kezdesti
VAShINGTON. KAZINFORM — Qasym-Jomart Toqaevtyń Vashıngtonǵa sapary Memlekettik hatshy Mark Rýbıomen, Saýda mınıstri Govard Latnıkpen, sondaı-aq AQSh Prezıdentiniń Ońtústik jáne Ortalyq Azııadaǵy arnaıy ókili Serdjıo Gormen kezdesýden bastaldy. Bul týraly Aqordanyń baspasóz qyzmeti habarlady.
Basqosýǵa qatysýshylar ekijaqty jáne óńirlik kún tártibiniń basty aspektileri jóninde pikir almasty.
Memleket basshysy Qazaqstan men AQSh úshin jańa jumys oryndaryn ashýǵa, ónerkásip pen bıznesti qoldaýǵa septigin tıgizetin ekonomıkalyq yqpaldastyq arqyly strategııalyq seriktestikti odan ári nyǵaıtýǵa oraıly múmkindik týǵanyn atap ótti.
Prezıdenttiń aıtýynsha, elimiz AQSh-pen túrli deńgeıde belsendi saıası baılanys ornatqan ári san qyrly yntymaqtastyqty tereńdetý boıynsha konstrýktıvti dıalog júrgizýge daıyn.