Prezıdent AQSh Kongresiniń senatory Stıv Deınsti qabyldady
ASTANA. KAZINFORM – Memleket basshysy AQSh Kongresiniń senatory Stıv Deınsti qabyldady. Kezdesýde Prezıdent Qasym-Jomart Toqaev senator Stıv Deınsti AQSh táýelsizdiginiń 250 jyldyǵymen quttyqtady, dep habarlaıdy Aqorda.
Memleket basshysy Qazaqstan men Qurama Shtattar arasyndaǵy kópjosparly yntymaqtastyqtyń damý qarqynyn joǵary baǵalady. Saýda-ekonomıkalyq jáne ınvestıtsııalyq yqpaldastyqtyń ornyqty ósimine nazar aýdaryldy.
Prezıdent byltyr qarasha aıynda AQSh-qa sapary barysynda qol qoıylǵan ekijaqty kelisimderdi sapaly júzege asyrýdyń mańyzyn atap ótti.
Osy oraıda Qasym-Jomart Toqaev jyl sońynda Maıamıde ótetin G20 sammıtine qatysý úshin AQSh-qa jasaıtyn sapary aıasynda ekijaqty yqpaldastyqty odan ári tereńdetýge daıyn ekenin aıtty.
Memleket basshysy Qazaqstan men Qurama Shtattar arasyndaǵy keńeıtilgen strategııalyq seriktestikti nyǵaıtýǵa úles qosqany, sonymen birge Djekson-Venık túzetýleriniń kúshin joıý jónindegi zańnamalyq bastamany ilgeriletý máseleleri boıynsha elimizdi udaıy qoldap kele jatqany úshin senatorǵa rızashylyǵyn bildirdi.
Stıv Deıns qazaq-amerıka qarym-qatynasyn keńeıtýge beıildiligi úshin Qasym-Jomart Toqaevqa AQSh Prezıdenti Donald Tramptyń jyly lebizi men yqylasyn jetkizdi
Senator Qazaqstannyń jańa Konstıtýtsııa qabyldaǵanyna erekshe toqtalyp, Prezıdentti aýqymdy saıası reformalardy tabysty iske asyrýymen quttyqtady.
Stıv Deıns Negizgi zańǵa arqaý bolǵan qaǵıdattar men qundylyqtar Qazaqstandy qýatty ári ozyq memleket retinde odan ári jańǵyrtýǵa berik negiz qalaıtynyna senim bildirdi.
Áńgimelesý barysynda halyqaralyq jáne aımaqtyq kún tártibiniń ózekti máseleleri jóninde pikir almasý ótti.
Aıta keteıik, Prezıdent keshe Euronews dırektorlar keńesiniń tóraǵasy Pedro Vargas Davıdti qabyldady.
