Prezıdent AQSh kompanııalaryn elimizdiń aýyl sharýashylyǵy áleýetin barynsha paıdalanýǵa shaqyrdy
NЬıÝ-IORK. KAZINFORM — Memleket basshysy PepsiCo jáne Mars kompanııalarynyń zamanaýı, eksportqa baǵdarlanǵan zaýyt salý josparyn quptaıtynyn jetkizdi, dep habarlaıdy Aqordanyń baspasóz qyzmeti.
Prezıdenttiń pikirinshe, ózara tıimdi yntymaqtastyqtyń taǵy bir perspektıvti baǵyty — agroónerkásip kesheni. Egistik jerleriniń kólemi jaǵynan álemde altynshy oryn alatyn jáne eń iri astyq eksporttaýshylardyń ondyǵyna kiretin Qazaqstannyń atalǵan saladaǵy múmkindikteri amerıkalyq áriptesterdi qyzyqtyrýǵa tıis.
— Amerıkalyq kompanııalardy Qazaqstannyń aýyl sharýashylyǵy áleýetin barynsha paıdalanýǵa shaqyramyz. Biz PepsiCo jáne Mars kompanııalarynyń zamanaýı, eksportqa baǵdarlanǵan zaýyt salý josparyn quptaımyz. Atalǵan bastamalar Qazaqstannyń eksporttyq qýatyn arttyryp qana qoımaı, ónimderimizdiń jańa óńirlik naryqtarǵa shyǵýyna múmkindik beredi. Yntymaqtastyǵymyzdy odan ári nyǵaıtý úshin ornyqty aýyl sharýashylyǵyn damytýdy, sý resýrstaryn únemdep paıdalanýdy jáne atalǵan salany tsıfrlandyrýdy kózdeıtin ortaq Agroınnovatsııalyq baǵdarlama jasaýdy usynamyz, — dedi Memleket basshysy.
Osydan buryn Qasym-Jomart Toqaev kólik jáne logıstıka sektoryndaǵy keń múmkindikterge toqtaldy.