Prezıdent AQSh Qarjy korporatsııasynyń halyqaralyq damý jónindegi atqarýshy dırektoryn qabyldady
ASTANA. KAZINFORM - Prezıdent Qasym-Jomart Toqaev meımanǵa iltıpat tanytyp, bul sapar Vashıngtonda qol jetkizilgen kelisimderdiń jalǵasy, sondaı-aq AQSh-pen san qyrly yntymaqtastyqty tereńdetý jolyndaǵy mańyzdy qadam sanalatynyn atap ótti, dep habarlaıdy Aqordanyń baspasóz qyzmeti.
Memleket basshysynyń aıtýynsha, Aq úı ákimshiligine Donald Tramp kelgennen bastap Vashıngton Astanamen jáne Ortalyq Azııa aımaǵymen yqpaldastyqty aıtarlyqtaı jandandyra túsken.
– Biz AQSh Prezıdentiniń dıplomatııaǵa degen batyl kózqarasyn jáne pragmatıkalyq ustanymyn tolyq qoldaımyz. Qazaqstan Amerıkanyń Ibrahım kelisimderi, Beıbitshilik keńesi, TRIPP bastamasy jáne basqa da negizgi jobalaryn ilgeriletýge belsendi atsalysýda. Birlesken kúsh-jigerimiz búginde burynǵydan da bekı túsken keńeıtilgen strategııalyq seriktestigimizge tyń serpin berdi. Sizdiń saparyńyz Qazaqstandaǵy aýqymdy saıası jáne ekonomıkalyq ózgeristermen tuspa-tus kelip otyr. Bul reformalar elimizdi resýrstarǵa táýeldi modelden bilimge baǵdarlanǵan ártarapty ekonomıkaǵa kóshirýge baǵyttalǵan. Korporatsııańyzdyń ınvestıtsııalyq basymdyqtary Qazaqstannyń damý kún tártibine saı keledi. Biz naqty ári ózara tıimdi yntymaqtastyqqa daıynbyz, – dedi Prezıdent.
Ben Blek qonaqjaılyq kórsetkeni úshin Memleket basshysyna alǵys aıtyp, Almatyda Qazaqstannyń iskerlik qaýymdastyǵymen óte nátıjeli ári mazmundy kezdesý ótkenine toqtaldy.
Qasym-Jomart Toqaev atalǵan kezdesýlerdiń ekijaqty baılanystardy keńeıtý turǵysynan ózektiligine jáne qol jetkizilgen ýaǵdalastyqtardy naqty iske asyrý qajettigine aıryqsha nazar aýdardy.
Memleket basshysy Qazaqstan tarapy birlesken ınvestıtsııalyq jobalardy qolǵa alýǵa daıyn ekenin rastady.
Kezdesýde asa mańyzdy mıneraldar, ózara kólik baılanysy, agroónerkásip kesheni, tsıfrlandyrý jáne jasandy ıntellekt salalaryndaǵy yntymaqtastyq perspektıvasy talqylandy.
Sonymen birge Qazaqstanda AQSh Qarjy korporatsııasynyń halyqaralyq damý jónindegi turaqty ókildigin ashý máselesi qaraldy.
Aıta keteıik, osyǵan deıin Memleket basshysy Qyrǵyz Respýblıkasy Jogorký Keneshiniń tóraǵasyn qabyldaǵan bolatyn.
