Prezıdent Ákimshiliginiń komıssııasy «Baǵanashyl» balalar úıine bardy
ASTANA. KAZINFORM — «Baǵanashyl» balalar úıiniń qyzmetine qatysty jaǵdaıdy jan-jaqty jáne obektıvti qyzmettik tekserý úshin Almatyǵa Prezıdent Ákimshiliginiń komıssııasy bardy.
Komıssııa músheleri stýdenttermen, mekeme basshylyǵy men qyzmetkerlerimen, sondaı-aq bilim berý júıesiniń ókilderimen kezdesti.
— Tekserý aıasynda Prezıdent Ákimshiliginiń ókilderi balalar úıindegi turmystyq jáne bilim berý jaǵdaıymen tanysyp, irgeles jatqan ınfraqurylym nysandaryn aralap kórdi. Qazir kóshý týraly sheshimge qatysty qujattar jınaqtalyp, taldanyp jatyr. Jetim balalarǵa qatysty zańnamada kózdelgen barlyq áleýmettik-quqyqtyq kepildiktiń saqtalýyna erekshe nazar aýdarylatyn bolady, — delingen habarlamada.
Tekserý balalardyń quqyqtary men múddelerin qorǵaý maqsatynda birinshi kezekte júrgizilýde jáne qysqa merzimde aıaqtalady.
Aıta ketelik «Baǵanashyl» balalar úıine baılanysty ýákiletti tulǵalarǵa qatysty qyzmettik tekserý bastaldy.
Eske salaıyq, keshe Almatyda ornalasqan oblystyq Balalar úıiniń tárbıelenýshileri Qonaev qalasyna kóshýge narazylyq bildirdi.
Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtin boldy.
Keıin Kámeletke tolmaǵandardy beıimdeý ortalyǵyndaǵy 39 bala Qonaevqa kóshti.