Prezıdent Ákimshiliginiń Basshysy Mańǵystaý oblysynyń jańa ákimin tanystyrdy
ASTANA. KAZINFORM - Memleket basshysy Qasym-Jomart Toqaevtyń tapsyrmasyna sáıkes Prezıdent Ákimshiliginiń Basshysy Aıbek Dádebaı Mańǵystaý oblysynyń barlyq deńgeıdegi máslıhattar depýtattarynyń jınalysyna qatysý úshin Aqtaý qalasyna jumys saparymen bardy.
Kezdesý barysynda Aıbek Dádebaı depýtattarǵa Mańǵystaý oblysynyń ákimi laýazymyna Nurdáýlet Igilikuly Qılybaı men Ulyqbek Serikuly Tnalıevtiń kandıdatýrasyn usyný týraly Prezıdenttiń hatyn oqyp berdi.
Ashyq daýys berý nátıjesinde 96 depýtat Nurdáýlet Qılybaıdyń, 17 depýtat Ulyqbek Tnalıevtiń kandıdatýrasyn qoldap daýys berdi. Jınalysqa barlyǵy 113 depýtat qatysty.
Daýys berý qorytyndysy boıynsha Prezıdent Jarlyǵymen Nurdáýlet Qılybaı Mańǵystaý oblysynyń ákimi laýazymyna taǵaıyndaldy.
Aıbek Dádebaı óńir aktıvine jańa ákimdi tanystyryp, Nurdáýlet Qılybaı osy aımaqtyń týmasy jáne oblysta túrli basshylyq qyzmetterdi atqarǵan tájirıbeli maman ekenin atap ótti. Sonymen qatar Prezıdent júktegen mindetterdi sapaly ári ýaqytyly oryndaý qajet ekenine nazar aýdardy.
– Memleket basshysynyń tikeleı qoldaýymen atqarylǵan jumystardyń nátıjesinde sońǵy 5 jylda óńirge 3,6 trıllıon teńgeden astam ınvestıtsııa tartylǵan. Bul – jańa jumys oryndary men ekonomıkalyq ósim. Aldaǵy ýaqytta atalǵan kórsetkishti eseleı túsýimiz kerek. Búginde oblysta Prezıdenttiń tapsyrmasyna saı ondaǵan jańa áleýmettik nysannyń qurylysy júrip jatyr. Onyń ishinde «Jaıly mektep» ulttyq jobasy aıasynda 22 myń oqýshyǵa arnalǵan 21 mekteptiń qurylysy bastalyp ketti. Bul – halyq sany jaǵynan ósimi jaqsy Mańǵystaý oblysy úshin asa qajetti sharalar. Óńir basshylyǵyna Prezıdent tarapynan mańyzdy mindetter júktelip otyr, – dedi Prezıdent Ákimshiliginiń Basshysy.
Aıbek Dádebaıdyń aıtýynsha, Mańǵystaý oblysynyń ákimdigine ınvestıtsııalyq ahýaldy jaqsartý, jańa óndiris oryndaryn ashý, kólik-logıstıka jáne týrıstik áleýetti barynsha damytý, turǵyndardy sapaly aýyzsýmen qamtamasyz etý, ınfraqurylymdy jańǵyrtý, ekologııalyq máselelerdi sheshý, qurylys salasyn retke keltirý mindetteri júkteledi.
Kezdesý sońynda Aıbek Dádebaı Nurdáýlet Qılybaıǵa oblys turǵyndarynyń ıgiligi úshin Prezıdent júktegen barlyq mindetti oryndaý jolynda tabys tilep, aımaqtyń burynǵy basshysy Nurlan Noǵaevqa atqarǵan jumysy úshin alǵys aıtty.
Osyǵan deıin Nurdáýlet Qılybaıdyń Mańǵystaý oblysynyń ákimi bolyp taǵaıyndalǵanyn jazdyq. Sondaı-aq osy qyzmetti 2 jyl 8 aı atqarǵan Nurlan Noǵaevtyń este qalǵan isterine qysqasha sholý jasadyq.
