Memleket basshysy Prezıdent Ákimshiligin zańnamalyq fýnktsııalarynyń birinen aıyrdy
ASTANA. KAZINFORM – Qasym-Jomart Toqaev Prezıdent Ákimshiligin zańnamalyq fýnktsııalarynyń birinen aıyrdy.
– «Qazaqstan Respýblıkasy Prezıdentiniń Ákimshiligi týraly erejeni bekitý týraly» QR Prezıdentiniń 2008 jylǵy 11 naýryzdaǵy № 552 Jarlyǵynda: joǵaryda atalǵan Jarlyqpen bekitilgen Qazaqstan Respýblıkasy Prezıdentiniń Ákimshiligi týraly erejede: 16-tarmaqtyń 6) tarmaqshasy alyp tastalsyn, - delingen Memleket basshysy Jarlyǵynda.
Atalǵan 6-tarmaqshada Prezıdent Ákimshiligi «Úkimettiń zańjobalyq jumys josparynyń jobalaryna, Úkimettiń zańjobalyq jumys josparyna ózgerister men tolyqtyrýlar engizý týraly sheshimder jobalaryna qorytyndy daıyndaıdy, sondaı-aq oryndaýlyna baqylaýdy júzege asyrady», - dep jazylǵan edi.
Sonymen qatar QR Úkimeti Parlament Májilisine engizetin zań jobalaryn QR Prezıdentiniń Ákimshiligimen kelisýdiń qaǵıdalary jańa redaktsııada osylaı berilgen:
– Ázirlengen jáne tıisti túrde resimdelgen zań jobalary Úkimettiń zań jobalary jumystarynyń josparynda zań jobasyn Parlamentke usyný úshin belgilengen merzim bastalǵanǵa deıin kúntizbelik 30 kúnnen keshiktirmeı Úkimet Apparaty Basshysynyń qoly qoıylyp, Prezıdent Ákimshiligine kelisýge usynylady. Zań jobalaryn Prezıdent Ákimshiligine kelisýge usyný merzimi jónindegi talap Bıýdjet kodeksin iske asyrý úshin jyl saıyn ázirlenetin zań jobalaryna qoldanylmaıdy. Bul rette qujattar toptamasynda zań jobalarymen birge olardy jan-jaqty qaraýǵa qajetti barlyq materıal (quqyqtyq, áleýmettik-ekonomıkalyq jáne qarjylyq negizdemeler, saraptamalardyń qorytyndylary jáne basqa da qujattar) bolýǵa tıis. Prezıdent Ákimshiligine aldyn ala kelisýge usynylatyn zań jobalary memlekettik organdar arasyndaǵy kelispeýshilikter joıylǵannan keıin ǵana engiziledi, - delingen jańartylǵan qaǵıdada.
Prezıdent Ákimshiligine usynylǵannan keıin zań jobalaryn Prezıdent Ákimshiliginiń Memlekettik quqyq bólimi jáne ózge de múddeli qurylymdyq bólimsheleri, QR Prezıdentiniń tıisti kómekshileri men keńesshileri qaraıdy.
– Prezıdent Ákimshiliginde zań jobalaryna saraptama júrgizý jáne olar boıynsha qorytyndy daıyndaý merzimi olar Prezıdent Ákimshiligine kelip túsken kúnnen bastap 10 jumys kúninen aspaýy tıis. Bul rette konstıtýtsııalyq zańdardyń, kodeksterdiń jáne qoldanystaǵy konstıtýtsııalyq zańdarǵa, kodeksterge ózgerister jáne tolyqtyrýlar engizýdi kózdeıtin zańdardyń jobalary boıynsha mundaı merzim 15 jumys kúninen aspaýǵa tıis. Prezıdent Ákimshiliginde QR Konstıtýtsııasynyń 61-baby 2-tarmaǵynyń ekinshi bóligine jáne 3-tarmaǵynyń úshinshi bóligine sáıkes ázirlengen zań jobalary, sondaı-aq QR Úkimetiniń zań kúshi bar ýaqytsha qaýlylarynyń jobalary boıynsha saraptama júrgizý jáne olar boıynsha qorytyndy daıyndaý merzimi, eger tıisti tapsyrmada ózgeshe belgilenbese, olar Prezıdent Ákimshiligine kelip túsken kúnnen bastap 10 jumys kúninen aspaýǵa tıis, - delingen qujatta.
Zań jobalaryna saraptama jasalyp, Prezıdent Ákimshiliginiń Memlekettik quqyq bóliminiń jáne ózge de múddeli qurylymdyq bólimsheleriniń, QR Prezıdentiniń kómekshileri men keńesshileriniń tıisti qorytyndylary daıyndalǵannan keıin materıaldar Prezıdent Ákimshiligi basshylyǵynyń qoly qoıylyp, aıtylǵan eskertýler men usynystardy eskere otyryp odan ári pysyqtaý úshin Úkimet Apparatyna jiberiledi. Atalǵan qorytyndylar olardyń kóshirmelerin jiberý arqyly QR Prezıdentiniń Parlamenttegi Ókildiginiń nazaryna jetkiziledi.
Osy Qaǵıdalardyń 6-tarmaǵynda kózdelgen zań jobalary boıynsha qorytyndylar Prezıdent Ákimshiliginiń Basshysymen mindetti túrde kelisilýge tıis. Zań jobasyna Prezıdent Ákimshiliginiń Memlekettik quqyq bólimi jáne ózge de múddeli qurylymdyq bólimsheleri, QR Prezıdentiniń kómekshisi nemese keńesshisi teris qorytyndy bergen jaǵdaıda materıaldar osy qorytyndymen birge ol boıynsha ári qaraı túpkilikti sheshim qabyldaý úshin Prezıdent Ákimshiliginiń Basshysyna jiberiledi.
Sonymen qatar zań jobalary boıynsha Prezıdent Ákimshiligi aıtqan eskertýler joıylǵannan nemese olar boıynsha Prezıdent Ákimshiligimen arada týyndaǵan kelispeýshilikter joıylǵannan keıin, Úkimet olardy Parlament Májilisine engizedi.
Atap aıtqanda, mynalar Prezıdent Ákimshiligimen mindetti túrde aldyn ala kelisilýge tıis:
1) Parlamentte qaralýy Memleket basshysynyń atynan basym dep aıqyndaý josparlanǵan zań jobalary;
2) Memleket basshysynyń tıisti tapsyrmalary iske asyrylatyn zań jobalary;
3) konstıtýtsııalyq zańdardyń, kodeksterdiń jobalary, sondaı-aq qoldanystaǵy konstıtýtsııalyq zańdardy, kodeksterdi ózgertý men tolyqtyrýǵa baǵyttalǵan zań jobalary;
4) jergilikti memlekettik basqarý men jergilikti ózin-ózi basqarýdy, eldiń saıası jáne saılaý júıelerin jetildirýge baǵyttalǵan zań jobalary;
5) qorǵanys, ulttyq qaýipsizdik, quqyq qorǵaý qyzmeti jáne sot tóreligin júzege asyrý salalaryndaǵy quqyqtyq qatynastardy reglamentteıtin zań jobalary;
6) aldaǵy qarjy jylyna arnalǵan respýblıkalyq bıýdjet týraly, sondaı-aq tıisti qarjy jylyna arnalǵan respýblıkalyq bıýdjet týraly zańǵa ózgerister men tolyqtyrýlar engizýdi kózdeıtin zań jobalary;
7) QR Konstıtýtsııasynyń 61-baby 2-tarmaǵynyń ekinshi bóligine jáne 3-tarmaǵynyń úshinshi bóligine sáıkes ázirlengen zań jobalary, sondaı-aq Úkimettiń zań kúshi bar ýaqytsha qaýlylarynyń jobalary.