Prezıdent Ákimshiligi quryltaıda berilgen tapsyrmalardy qadaǵalaýda ustaıdy
BÝRABAI. KAZINFORM – Ulttyq quryltaıda Prezıdent ózekti suraqtarǵa jaýap berip qana qoımaı, keıbiri boıynsha kesimdi baılamyn aıtty, Qazaqstannyń uzaq merzimdi damý baǵyttary boıynsha da óz ustanymdaryn ortaǵa saldy. Bul pikirdi QR Prezıdenti Ákimshiliginiń basshysy Aıbek Dádebaı Prezıdent Teleradıokeshenine bergen suhbatynda aıtty.

− Ulttyq quryltaı – Prezıdent bastamasymen qurylǵan halyq pen bıliktiń arasyndaǵy tıimdi dıalog júrgizýdiń taptyrmas alańy. Quryltaı otyrystarynda mádenı-rýhanı salany, bilim men ǵylymdy, ishki saıasatty, ekonomıkalyq jáne áleýmettik salany damytý boıynsha kóptegen ózekti máseleler talqylanady. Búgin Býrabaıda ótip jatqan Ulttyq quryltaıdyń ІV otyrysynyń ereksheligi – Prezıdent tek qana ózekti suraqtarǵa jaýap berip qana qoımaı, sonymen qatar, keıbiri boıynsha kesimdi baılamyn aıtty deýge bolady. Sonymen qatar, Prezıdent Qazaqstannyń uzaq merzimdi damý baǵyttary boıynsha óziniń ustanymdaryn da ortaǵa saldy, − dep pikir bildirdi A.Dádebaı.
Onyń aıtýynsha, Memleket basshysy adam áleýetin damytý, iri ınfraqurylymdyq, kóliktik, energetıkalyq jobalardy júzege asyrý, agroónerkásiptik salany damytý, tsıfrlandyrý jáne jasandy ıntellekt júıelerin damytý jónindegi arnaıy tapsyrmalaryn da berdi.
− Onyń birqatary endigi kezekte zańnamalyq qamtamasyz etýdi talap etedi. Bul rette Úkimet Parlamentpen birlesip, qoǵam men sarapshylardy tarta otyryp, keń aýqymdy jumysty júrgizý mindeti tur. Al Prezıdent Ákimshiligi bolsa, bul jumystardy, sonymen qatar búgin Prezıdenttiń Ulttyq quryltaıda bergen barlyq tapsyrmalaryn óz qadaǵalaýynda ustaıtyn bolady, − dedi Prezıdent Ákimshiliginiń basshysy.
Eske salsaq, budan buryn Qasym-Jomart Toqaev Býrabaıda ótetin Ulttyq quryltaıdyń IV otyrysyna qatysatyny habarlanǵan edi.
Ulttyq quryltaı jandanǵaly eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy. Alqaly jıynda nazarda bolǵan kemshilikti túzetý zań sheńberinde bekip, qoǵamnyń oń baǵytqa bet alǵanyn baıqaımyz. Osy oraıda Kazinform tilshisi ótken quryltaılardyń nátıjesine jóninde sholý ázirlegen edi.