Máslıhattar men ákimdikter bıýdjettiń ár teńgesiniń El ıgiligine jumsalýyn qamtamasyz etýge mindetti – Toqaev
ASTANA. KAZINFORM – Memleket basshysy Qasym-Jomart Toqaev barlyq deńgeıdegi máslıhat depýtattarynyń ІІІ respýblıkalyq forýmynda ákimdiktegi bıýdjettik komıssııanyń quramyna bilimdi, bedeldi máslıhat depýtattaryn qosý kerek ekenin aıtty. Bul týraly Aqorda habarlady.
Sonymen qatar qyrýar qarjyny ońdy-soldy shashyp, paıdasy joq bastamalarǵa jumsaýdy doǵarý qajet ekenin atap ótti.
– Ákimdiktegi bıýdjettik komıssııanyń quramyna bilimdi, bedeldi máslıhat depýtattaryn qosqan jón. Osylaısha, jumystyń sapasyn arttyryp, qarajattyń tıimdi jumsalýyn qadaǵalaýǵa bolady. Qyrýar qarjyny ońdy-soldy shashyp, paıdasy joq bastamalarǵa jumsaýdy doǵarý qajet. Ákimder respýblıkalyq bıýdjetten beriletin túrli dotatsııaǵa senip otyra bermeýi kerek. Masyldyq uǵymynan birjola arylý qajet. Jergilikti bılik ókilderi tabysty kóbeıtý úshin belsene jumys isteýge tıis. Bıýdjet qabyldanatyn kezde «Qansha jumys orny ashylady, jeke ınvestıtsııa tartyla ma, bıznestiń damýyna qandaı jaǵdaı jasalady, qansha salyq tólenedi?» degen saýaldarǵa naqty jaýap berilýi kerek. Kúrishti kúrmekten ajyrata bilý qajet. Bul – barlyq deńgeıdegi ákimder men máslıhattar depýtattary, eń aldymen, memleket múddesine qyzmet etetin bir ujym, bir komanda degen sóz. Barlyq aımaqtyń máslıhattary men ákimdikteri birlesip, bıýdjettiń ár teńgesiniń el ıgiligine jumsalýyn qamtamasyz etýge mindetti, - dedi Prezıdent.
Memleket basshysy ıımaqtar bıýdjetin muqııat josparlap, tabysyn arttyrýǵa basa mán berýge tıis ekenin aıtty.
