Prezıdent: Ákim – eń aldymen, halyqpen tikeleı jumys isteıtin memlekettik qyzmetshi

ASTANA. KAZINFORM – Prezıdent Qasym-Jomart Toqaev aýyl ákimderiniń dıalog-platformasynda sóz sóılep, ákimniń, eń aldymen halyqpen tikeleı jumys isteıtin memlekettik qyzmetshi ekenin eske saldy.

«Búgingi jıynnyń mán-mańyzy aıryqsha. Elimizdegi barlyq deńgeıdegi atqarýshy bılik ókilderi osy jerge arnaıy shaqyryldy. Aýyl ákimderiniń basym kópshiligi, ıaǵnı 80 paıyzy osynda. Jalpy, osyndaı aýqymdy qurammen alǵash ret bas qosyp otyrmyz.

Shyn máninde, taqyryp — óte ózekti. Aýyldyń jaǵdaıy — elimiz úshin strategııalyq mańyzy bar másele. Sebebi halqymyzdyń tamyry — aýylda. Aýyldarymyz myqty bolsa, elimiz de berekeli bolmaq. Sondyqtan aýyl ákimderine qoıylatyn talap ta, olarǵa júkteletin mindet te árdaıym erekshe.

Ákim — eń aldymen, halyqpen tikeleı jumys isteıtin memlekettik qyzmetshi. Bul — óte jaýapty jumys. Aýyl ákimi aýyldyń bolmysyn, aýyldaǵy aǵaıynnyń ómirin jete túsinetin naǵyz isker maman bolýy kerek», — dedi Memleket basshysy.

Qasym-Jomart Toqaev jańa ǵana birneshe ákimniń sózin tyńdaǵanyn atap ótip, aıtylǵan oı-pikirlerdi jáne usynystardy muqııat zerdelep, jumys barysynda mindetti túrde eskerý qajettigin jetkizdi.

Aıta keteıik, Astanada aýyl ákimderiniń dıalog-platformasy ótip jatyr.