Prezıdent aqyn Valerıı Mıhaılovty 80 jasqa tolýymen quttyqtady
ASTANA. KAZINFORM — Memleket basshysy Qazaqstannyń halyq jazýshysy Valerıı Mıhaılovqa quttyqtaý jedelhatyn joldady, dep habarlaıdy Aqordanyń baspasóz qyzmeti.
Qasym-Jomart Toqaev aqyn, jýrnalıst, Qazaqstannyń halyq jazýshysy Valerıı Mıhaılovty 80 jyldyq mereıtoıymen quttyqtady.
— Tabıǵı talantyńyz ben eńbekqorlyǵyńyzdyń arqasynda shyǵarmashylyq jolyńyzda eren tabysqa qol jetkizdińiz. Uzaq jyldar boıy elimizdiń bedeldi basylymdarynda jemisti eńbek etip, «Kazahstanskaıa pravda» gazeti men «Prostor» jýrnalyn basqardyńyz. Adamgershiligi mol ári ómirlik ustanymdarynan aınymaǵan tulǵa retinde qalamgerler arasynda jáne qoǵamda úlken qurmetke bólendińiz, — dep jazylǵan jedelhatta.
Prezıdent Qasym-Jomart Toqaev Valerıı Mıhaılovtyń birneshe býyn oqyrman qyzyǵa oqıtyn shyǵarmalary tól ádebı qazynamyzdyń bir bólshegi retinde laıyqty baǵaǵa ıe bolǵanyna nazar aýdardy.
Budan buryn Prezıdent Qasym-Jomart Toqaev jazýshy Valerıı Mıhaılovty joǵary memlekettik nagradamen marapattaǵanyn jazdyq.
