Prezıdent aqyn Temirhan Medetbektiń otbasy men jaqyn týystaryna kóńil aıtý jedelhatyn joldady

ASTANA. KAZINFORM — Memleket basshysy aqyn, Qazaqstannyń Halyq jazýshysy Temirhan Medetbektiń otbasy men jaqyn týystaryna kóńil aıtý jedelhatyn joldady. Bul týraly Aqorda málim etti. 

Prezıdent Qasym-Jomart Toqaev aqyn, Qazaqstannyń Halyq jazýshysy, Memlekettik syılyqtyń laýreaty, «Qurmet» jáne «Parasat» ordenderiniń ıegeri, qoǵam qaıratkeri Temirhan Medetbektiń dúnıeden ótýine baılanysty onyń otbasy men jaqyn-jýyqtaryna kóńil aıtty.

– Temirhan Medetbek ǵıbratty ǵumyryn ult rýhanııatyna arnaǵan, tól ádebıetimiz ben ónerimizdiń janashyry bolǵan tegeýrindi aqyn edi. Kóne túrki sarynyn jańǵyrtqan rýhty shyǵarmalary oqyrman tarapynan joǵary baǵalandy. Qazaq baspasóziniń órkendeýine eleýli eńbek sińirip, naǵyz shyǵarmashyl tulǵa retinde ónegeli ómir súrdi. Sońyna ádebı baı mura qaldyrǵan Temirhan Medetbektiń jarqyn beınesi men esimi umytylmaıdy, – delingen jedelhatta.

Eske sala keteıik, Qazaqstannyń halyq jazýshysy, kórnekti aqyn Temirhan Medetbek dúnıeden ozdy. Qaraly habardy Jazýshylar odaǵy basqarma tóraǵasynyń orynbasary Qasymhan Begmanov jarııalady.