Prezıdent Ákimshiliginiń qyzmetkerleri birkúndik jalaqylaryn koronavırýspen kúreske aýdardy
NUR-SULTAN. QazAqparat - QR Prezıdenti Ákimshiliginiń qyzmetkerleri birkúndik eńbekaqylaryn elimizdegi koronavırýstyń taralýyna qarsy kúreske kómek retinde aýdarýǵa sheshim qabyldady. Bul týraly Memleket basshysynyń baspasóz hatshysy Berik Ýálı málim etti, dep habarlaıdy QazAqparat.
«Aýdarylǵan qarajat elorda men Almaty qalalarynyń pandemııa saldaryn óz bastarynan ótkergen turǵyndarǵa beriledi. Sonymen qatar jınalǵan qarjy koronavırýsqa qarsy kúreske atsalysyp jatqan medıtsına qyzmetkerlerin yntalandyrýǵa da jumsalady. Bul qarajattyń bir bóligin juqpaly aýrýlar aýrýhanalaryn qoldaýǵa, maskalar men basqa da qajetti qorǵanysh quraldaryn satyp alýǵa jumsaý josparlanýda. Budan bólek balalar úılerine de kómek kórsetiledi», - dep jazdy B.Ýálı Facebook-te.
Eske salaıyq, koronavırýs ınfektsııasynyń taralýyna baılanysty Qazaqstanda 16 naýryz ben 15 sáýir aralyǵynda tótenshe jaǵdaı jarııalandy.
Al 19 naýryzdan bastap ınfektsııa tirkelgen eki qalada - Nur-Sultan men Almatyda karantın rejımi engiziledi.
Osy ýaqytqa deıin Almaty qalasynda ınfektsııaǵa shaldyqqan – 18, Nur-Sultan qalasynda - 18 adam, jalpy 36 naýqas tirkeldi.
