Prezıdent Ákimshiliginiń basshysy Ulytaý oblysynyń jańa ákimin tanystyrdy

NUR-SULTAN. QazAqparat - Memleket basshysy Qasym-Jomart Toqaevtyń tapsyrmasymen Prezıdent Ákimshiliginiń basshysy Murat Nurtileý Ulytaý óńiriniń barlyq deńgeıdegi máslıhattarynyń jıynyna qatysý úshin jumys saparymen Jezqazǵan qalasyna bardy, dep habarlaıdy Aqordanyń baspasóz qyzmeti.

Depýtattar jıynynda Murat Nurtileý Prezıdenttiń Ulytaý oblysynyń ákimi laýazymyna Berik Ábdiǵalıuly men Serik Shaıdarovtyń kandıdatýralaryn usyný týraly hatyn oqyp berdi.

Ashyq daýys berý nátıjesinde 64 depýtattyń 51-i Berik Ábdiǵalıulyn qoldady, 13 depýtat Serik Shaıdarovqa daýys berdi. Budan keıin Memleket basshysy Berik Ábdiǵalıulyn Ulytaý oblysynyń ákimi laýazymyna taǵaıyndaý týraly Jarlyqqa qol qoıdy.

Jańadan qurylǵan oblystyń aktıvimen kezdesýde Prezıdent Ákimshiliginiń basshysy taǵaıyndalǵan ákimniń osy oblysta dúnıege kelgenin, Ulytaý aýdany men Jezqazǵan qalasynyń ákimi laýazymdarynda qyzmet etkenin jáne Parlament Májilisiniń depýtaty bolǵanyn atap ótti.

Jıynda Murat Nurtileý Memleket basshysynyń Ulytaý oblysyn qurý týraly sheshimi halqymyzdyń birligi men tutastyǵynyń sımvolyna aınalǵan qasıetti Ulytaý aımaǵyn jańǵyrtýǵa jol ashatyn tarıhı oqıǵa ekenin aıtty. Onyń pikirinshe, jańa óńirdiń qurylýy aımaq turǵyndarynyń qordalanǵan máselelerin sheshýge, óńirdiń áleýmettik-ekonomıkalyq damýyna eleýli septigin tıgizedi.

Sondaı-aq Murat Nurtileý jańa ákimge barlyq memlekettik organdar men mekemelerdiń qalypty jumys isteýin qamtamasyz etý jáne halyqtyń ál-aýqatyn arttyryp, óńirdi damytý sııaqty mindetter júktelip otyrǵanyn jetkizdi.

Prezıdent Ákimshiliginiń basshysy óńirdiń iri ónerkásip aımaǵyna aınalýǵa múmkindigi zor ekenine nazar aýdardy. Sonymen qatar oblys aýmaǵynan ótetin kúre joldarǵa aıyryqsha mán berip, óńirdi elimizdiń ońtústik, shyǵys jáne soltústik óńirlerin baılanystyratyn iri kólik-logıstıkalyq jelige aınalýy tıis ekenin atap ótti.