Prezıdent Ákimshiliginiń basshysy Abaı oblysynyń jańa ákimin tanystyrdy

NUR-SULTAN. QazAqparat – Prezıdent Ákimshiliginiń basshysy Murat Nurtileý búgingi jumys sapary aıasynda Semeı qalasyna baryp, óńirdiń barlyq deńgeıdegi máslıhattarynyń jıynyna qatysty, dep habarlaıdy QazAqparat Aqordaǵa silteme jasap.

Murat Nurtileý Abaı oblysynyń ákimi laýazymyna Ýranhaev Nurlan Telmanuly men Smaıylov Ashat Saıdahmetulynyń kandıdatýralaryn usyný týraly Memleket basshysynyń hatyn oqyp berdi.

Ashyq daýys berý nátıjesinde 25 depýtat Ashat Smaıylovqa, 89 depýtat Nurlan Ýranhaevqa daýys berdi.

Prezıdent Ákimshiliginiń basshysy jańadan qurylǵan oblystyń ákimin tanystyra kele, Nurlan Ýranhaevtyń Semeı qalasynda dúnıege kelgenin jáne onyń jaýapty basqarýshylyq qyzmetterde tájirıbesi mol ekenin atap ótti.

Murat Nurtileý oblysqa qazaqtyń uly aqyny Abaı esiminiń berilýi halyqtyń rýhyn kóteretin tarıhı ári ádil sheshim bolǵanyn aıtty.

Kezdesý sońynda Murat Nurtileý Nurlan Ýranhaevqa oblys turǵyndarynyń ıgiligi úshin Prezıdent júktegen mindetterdi abyroımen atqarýdy tiledi.