Prezıdent Ákimshiligi jeńildikpen qalaı baspana alýǵa bolatynyn túsindirdi
NUR-SULTAN. QazAqparat – QR Prezıdenti Ákimshiligi qoǵamdyq qabyldaýynyń Telegram-daǵy paraqshasynda qandaı sanattaǵy azamattar jeńildikpen baspana ala alatyndyǵyn túsindirdi, dep habarlaıdy QazAqparat tilshisi.
«Belgili bir sanattaǵy azamattarǵa jeńildikpen baspana berý búgingi kúni Qazaqstandaǵy eń ózekti máselelerdiń biri bolyp tur. Osyǵan qaraı Ótinishterdi baqylaý bólimi «Nurly jer» turǵyn úı baǵdaralmasynyń 2020-2025 jyldarǵa uzartylǵandyǵyn habarlaıdy. «Biryńǵaı turǵyn úı saıasatyn júzege asyrý» birinshi mindeti aıasynda baspana qoljetimdiligi satysy engizilip, onda aıqyndýshy faktor halyqtyń kirisi bolady», - delingen taratylǵan aqparatta.
Ótinishterdi baqylaý bóliminiń málimetinshe, otbasy múshesine bir kúnkóris mınımýmyna (29,7 myń teńge) deıin tabysy bar kezekte turǵan azamattarǵa (jetim balalarǵa, 1, 2-toptaǵy múgedekterge, zeınetkerlerge jáne basqalaryna) satyp alýǵa bolmaıtyn jaldamaly baspana beriledi.
«Baqytty otbasy» baǵdarlamasy arqyly otbasy múshesine eki kúnkóris mınımýmyna (59,4 myń teńge) deıin tabysy bar azamattar (kópbalaly, tolyq emes jáne múgedek balalary bar otbasylar) páter alýyna múmkindigi bar.
Otbasy múshesine 3,1 kúnkóris mınımýmyna (92 myń teńge) deıin tabysy bar kezekte turǵandar (áskerı qyzmetshiler, bıýdjet jáne memlekettik qyzmetkerler) «5-20-25» baǵdarlamasymen ákimdikterdiń kredıttik baspanasyna úmitker bola alady. Tabysy 3,1 kúnkóris mınımýmynan joǵary azamattar «7-20-25» baǵdarlamasyna qatysa alady.
Al tabysy 5 kúnkóris mınımýmynan (148,5 myń teńge) joǵary azamattar «Baspana-hıt», «Orda» QIK, Turǵynúıqurylysjınaqbankiniń «Óz úıim» naryqtyq ónimderi arqyly bastapqy jáne qaıtalama páter satyp alýyna múmkindik jasalǵan.
«Baspana alý ashyqtyǵyn qamtamasyz etý jáne biryńǵaı júıeli esepke alý úshin Turǵyn úı kezeginde turǵandardyń biryńǵaı respýblıkalyq bazasy engiziledi. Atalǵan baza kezekke turǵandarǵa baspananyń qoljetimdiligin aıqyndaý úshin qoldanylady. Bul memlekettik qoldaýdyń ataýlyǵyn jáne memleket qarajatyn kádege jaratý tıimdiligin qamtamasyz etedi», - dep atap ótedi QR Prezıdenti Ákimshiliginiń qoǵamdyq qabyldaýy.
