Prezıdent Ákimshiligi volonterleri eń belsendi tórt óńirdi atady

NUR-SULTAN. QazAqparat – QR Prezıdenti Ákimshiliginiń memlekettik baqylaý jáne aımaqtyq uıymdastyrý bóliminiń meńgerýshisi Nurlan Saýranbaev aımaq basshylaryna «Rýhanı jańǵyrý» jobalyq keńseleriniń jumysyna nazar aýdarýdy surady, dep habarlaıdy QazAqparat tilshisi.

«Óńirlerden kelgen esepter áleýmettik máselelerdi sheshýde eriktiler jetkilikti deńgeıde tartylmaı jatqanyn kórsetedi. Volonterler azamattyq bastamalardyń damýynyń, áleýmettik jaýapkershilik pen patrıotızmdi qalyptastyrýdyń faktory sanalady. Qazirgi tańda jeke óńirler ǵana qaıyrymdylyq sharalaryna belsendi túrde volonterlerdi tartyp otyr. Ol aımaqtar: Qyzylorda, Mańǵystaý, Shyǵys Qazaqstan men Túrkistan oblystary», - dedi ol Aqordada ótken jıynda.

Onyń aıtýynsha, Aqmola, Túrkistan, Mańǵystaý oblystarynan, Almaty qalasynan basqa óńirlerdiń kóbi Qazaqstan Jazýshylar odaǵymen tarıhtaný men aımaqtaný baǵyttary boıynsha kelisimge kelmegen.

«Zaman talaptaryn eskere otyryp, iske qazirgi kommýnıkatsııalyq trendterdi paıdalanyp, tanymal blogerlerdi, halyq súıiktilerin, qoǵamdyq oı kóshbasshylaryn tartý kerek. Máselen, mıllıon jazylýshysy bar azamattar mundaı jumysqa tartylmaǵan. Sonymen qatar, óńirlerdegi «Rýhanı jańǵyrý» jobalyq keńseleriniń jumysyna óńir basshylarynyń nazaryn aýdartsaq deımiz. Qazirgi tańda aımaqtyq jobalyq keńseler KMM, JShS túrinde quqyqtyq formamen aıqyndalǵan. Jobalyq keńselerdiń kóbi jumysyn 2019 jyly bastady. Jyldyń sońyna deıin endi óńirlerde qandaı forma tıimdi ekenin aıqyndap alý kerek. Sonymen birge, ol jerdegi qyzmetkerlerdiń sany týrasynda da birizdilik joq. Óńirlerdegi keńselerdiń birinde 4 adam, ekinshisinde 26 adamǵa deıin jumys isteıdi. Óńirlik jobalyq keńselerge baǵdarlamany júzege asyrýda úlken jaýapkershilik júktelip otyr», - dedi ol.

Eske sala ketsek, Memlekettik hatshy Qyrymbek Kósherbaevtyń tóraǵalymen Aqordada búgin QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komıssııanyń otyrysy ótkizildi.