Prezıdent Ákimshiligi turǵyndardyń kezekti aryz-shaǵymyn qarady
NUR-SULTAN. QazAqparat – Elordada QR Prezıdenti Ákimshiliginiń qoǵamdyq qabyldaý bólimi kezekti ret azamattardyń aryz-shaǵymdaryn qarady, dep habarlaıdy QazAqparat.
Qabyldaýdy QR Prezıdentiniń kómekshisi — QR Prezıdenti Ákimshiliginiń Ótinishterdi qaraýdy baqylaý bóliminiń meńgerýshisi Aıda Balaeva jáne arnaıy jumys toby júrgizgen.
Ákimshiliktiń habarlaýynsha, tańǵy 10:00-den bastap, respýblıkanyń barlyq óńirinen 102 adam qabyldandy. Atap aıtqanda, Nur-Sultan qalasynan 55, Almaty qalasynan – 9, Shymkentten – 6, BQO – 6, Túrkistan oblysy – 4, ShQO, Qostanaı, Almaty, Mańǵystaý oblystarynan – 2, Jambyl, Aqtóbe, Qyzylorda oblystarynan – 1 turǵyn kelgen.
Olar quqyq qorǵaý jáne sot qyzmeti (55), jergilikti atqarý organdary (27), Densaýlyq saqtaý mınıstrligi (7), Ulttyq bank (6), Sybaılas jemqorlyqqa qarsy is-qımyl agenttigi (6), Ádilet mınıstrligi (5), Eńbek (5), BǴM (4), Aýyl sharýashylyǵy (1) mınıstrlikteriniń quziretindegi máselelerdi kótergen.
Sonymen birge, bul qabyldaýda jeke sot isteri kóp talqylanǵan. Olardyń basym bóligi medıtsına salasyna qatysty jáne jergilikti sot organdaryna kóńil tolmaýshylyq, turǵyn úı máseleleri kóterilgen.
