Prezıdent ákimshiligi laýazymdy tulǵalardyń ústinen 400-den astam eskertý túsirgen

ASTANA. QazAqparat – Jyl basynan beri Prezıdent ákimshiligi laýazymdy tulǵalardyń ústinen tapsyrmalardy ýaqtyly oryndamaıtyny týraly 400-den astam eskertý túsirgen. Úkimettiń keńeıtilgen otyrysynda Prezıdent Qasym-Jomart Toqaev osyndaı málimet aıtty, dep habarlaıdy QazAqparat tilshisi.

«Oryndaýshylyq tártipti arttyrý qajet. Memlekettik apparat jumysynda meniń tapsyrmalarymdy oryndaýdaǵy formaldy kózqaras áli saqtalyp otyr. Oryndaý merzimi ár túrli sebepterge baılanysty keshiktirilip, birneshe ret keıinge qaldyrylyp jatady.Jyl basynan beri Prezıdent Ákimshiligi memlekettik organdar men laýazymdy tulǵalardyń atyna tapsyrmalardy oryndaý sapasy boıynsha 400-den astam eskertý joldady», - dedi Memleket basshysy.

Prezıdent bul jaǵdaı Úkimet tarapynan baqylaý tıisti deńgeıde bolmaǵandyqtan qalyptasyp otyr dep esepteıdi.

«Premer-Mınıstr Keńsesiniń Úkimettiń qyzmetin qamtamasyz etetin organ retindegi baqylaý qyzmeti negizinen memlekettik organdardyń daıyn esepterin jiberýmen jáne qaıtalaýmen shekteldi. Tapsyrmalardy oryndaý sapasyn tıisti taldaý jáne baǵalaý joq», - dedi Qasym-Jomart Toqaev.