Prezıdent ákimderge monıtorıng júrgizetin toptardyń jumysyn jandandyrýdy júktedi
NUR-SULTAN. QazAqparat – Memleket basshysy Qasym-Jomart Toqaev monıtorıng júrgizetin toptardyń belsendiligin arttyrýdy tapsyrdy, dep habarlaıdy QazAqparat tilshisi.
«Monıtorıng júrgizetin toptardyń belsendiligi tómendep barady. Áleýmettik jeliler arqyly túrli jıyn-toılarda túsirilgen fotosýretter taralýda. Monıtorıng júrgizetin toptar tekseristerin azaıtty. Bul rette, karantın sharalary saqtalmaı, zań buzý derekteri kóbeıip ketti», - dedi Prezıdent koronavırýs indetiniń ekinshi kezeńine daıyndyq máseleleri boıynsha keńeste sóılegen sózinde.
Memleket basshysy ákimderge monıtorıng júrgizetin toptardyń jumysyn jandandyrýdy tapsyrdy.
«Vedomstvoaralyq komıssııa osyny qatań baqylaýǵa alýǵa tıis», - dedi ol.
