Prezıdent: Ákimder jaýapkershilikti ózine alyp, sheshim qabyldaýdan qashady

ASTANA. QazAqparat – Barlyq deńgeıdegi ákimderdiń jumysyn jyl saıyn baǵalaý júıesin engizý kerek. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Barlyq deńgeıdegi ákimderdiń jumysyn jyl saıyn baǵalaý júıesin engizý kerek. «Halyq únine qulaq asatyn memleket» bolýy úshin azamattarmen tyǵyz qarym-qatynas ornatý aıryqsha mańyzdy», - dedi Qasym-Jomart Toqaev.

Osy oraıda Prezıdent ákimderdiń jaýapkershiligin synǵa aldy.

«Árbir aımaqtyń óz ereksheligi jáne «álsiz tustary» bar. Ókinishke qaraı, ákimder sony bile tura, aldaǵy qıyndyqtardy ýaqtyly baǵamdaı almaıdy. Jaýapkershilikti ózine alyp, der kezinde sheshim qabyldaýdan qashady», - dedi Memleket basshysy.

Budan buryn habarlanǵandaı, Aýyl ákimderiniń 64 paıyzy jergilikti jurttyń tikeleı saılaýymen qyzmetke keldi.