Reıstiń keshigýi, borttyń aýysýy: Prezıdent Air Astana qyzmetindegi kemshilikterdi joıýdy tapsyrdy
ASTANA. KAZINFORM – Memleket basshysyna Ortalyq Azııa men Kavkazda jetekshi oryn alatyn Air Astana kompanııasynyń operatsııalyq jáne qarjylyq kórsetkishteri týraly málimet berildi. Bul týraly Aqordanyń baspasóz qyzmeti habarlady.
Qasym-Jomart Toqaevqa Air Astana áýe parkin 2026-2027 jyldary Boeing 787 Dreamliner jańa býyn ushaqtarymen tolyqtyrýdy josparlap otyrǵany baıandaldy.
Kompanııa Airbus A320neo jáne A321neo markaly 50 ushaqqa jáne Boeing 787-9 markaly 15 áýe kemesine tapsyrys bergen. Olar 2036 jylǵa deıin jetkiziledi.
Ibragım Janlyel Prezıdentke kompanııanyń uzaqmerzimdi damý strategııasyn tanystyrdy. Atalǵan qujat Qazaqstannyń óńirlik avıatsııalyq hab retindegi ornyn nyǵaıtýǵa jáne kompanııa qyzmetin halyqaralyq deńgeıde keńeıtýge baǵyttalǵan.
Air Astana baǵyt sanyn kóbeıtip, mýltımodaldi tasymaldy damytýdy, sondaı-aq ushý jıiligin ulǵaıtýdy josparlap otyr. Tsıfrlandyrý men jańa tehnologııalardy engizýge basa mán beriledi.
Qasym-Jomart Toqaev áýe parkin tolyqtyrý, baǵyttar jelisin arttyrý jáne tasymaldaý áleýetin nyǵaıtý sekildi strategııalyq maqsattardy tıimdi iske asyrýdyń mańyzyna toqtaldy. Prezıdent AQSh jáne Japonııa elderimen tikeleı áýe tasymalyn uıymdastyrýdy basymdyq retinde atady.
Memleket basshysy reıstiń keshigýi, borttyń aýysýy sekildi jolaýshylar tarapynan únemi syn aıtylatyn máselelerge nazar aýdaryp, qazaqstandyqtar jıi saıahattaıtyn eldermen áýe tasymalyn damytýǵa shaqyrdy.
Aıta ketelik Memleket basshysy Halyqaralyq gımnastıka federatsııasynyń prezıdenti (FIG) Morınarı Vatanabemen jáne Azııa gımnastıkalyq odaǵynyń (AGU) prezıdenti Abdýlrahman Ál-Shatrımen kezdesken edi.
