Qytaı korporatsııasy sý sharýashylyǵy ınfraqurylymyna ınvestıtsııa salýǵa daıyn
ASTANA. KAZINFORM — Sý resýrstary jáne ırrıgatsııa birinshi vıtse-mınıstri Nurlan Aldamjarov QHR-dan kelgen delegatsııamen kezdesti. Delegatsııany Energy China korporatsııasynyń prezıdenti Tsıao Sıýbın bastap keldi. Kezdesýde taraptar yntymaqtastyqtyń úsh negizgi baǵytyn talqylady. Bul týraly vedomstvonyń baspasóz qyzmeti málim etti.
Olar: sý sharýashylyǵy ınfraqurylymyn jańǵyrtý boıynsha birlesken ınvestıtsııalyq jobalardy iske asyrý, sý resýrstaryn basqarýǵa ınnovatsııalyq tásilderdi engizý, sonyń ishinde sýdy esepke alý men bólýdi tsıfrlandyrý, tazartylǵan aǵyn sýdy qaıta paıdalaný jáne sý únemdeý tehnologııalaryn engizý, sondaı-aq kadrlardy birlesip daıarlaý.
Qytaılyq bıznes ókilderi Sý resýrstary jáne ırrıgatsııa mınıstrligi ázirlegen 2030 jylǵa deıingi sý resýrstaryn basqarý júıesin damytý tujyrymdamasymen tanysyp shyqqanyn jáne Qazaqstannyń sý sharýashylyǵy salasyna ınvestıtsııa salýǵa daıyn ekenderin málimdedi.
Sonymen qatar Energy China ókilderi korporatsııa Qytaıda jáne basqa da elderde júzege asyrǵan eń iri jobalar týraly baıandap berdi. Kezdesý qorytyndysy boıynsha taraptar yntymaqtastyqtyń keleshek baǵyttaryn sarapshylar deńgeıinde egjeı-tegjeıli qarastyrýǵa kelisti.
«Biz birqatar qytaılyq kompanııamen belsendi túrde yntymaqtastyq ornatyp kelemiz. Mysaly, bıyl Power China korporatsııasymen jasalǵan memorandým aıasynda Qazaqstannyń sý salasyndaǵy 125 maman Qytaıda biliktiligin arttyrý kýrstarynan ótti. Bul jumys kelesi jyly da jalǵasady. Energy China kompanııasymen de yntymaqtastyq ornatýǵa jáne tájirıbe men tehnologııalar almasýǵa ashyqpyz,– dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Aıta keteıik, Shúlbi sý qoımasynan 6,32 mlrd tekshe metr sý jiberildi.