Prezıdent agrarlyq sala ǵalymdaryn marapattap, baspana kiltin tabystady

ASTANA. KAZINFORM – Aqordada Memleket basshysy Qasym-Jomart Toqaevtyń qatysýymen Ǵylym kúnine arnalǵan saltanatty jıyn ótti.

Jıynda Prezıdent ǵylymnyń el damýyndaǵy aıryqsha rólin atap ótip, osy salada eleýli eńbek etip júrgen ǵalymdardy marapattady.

Atap aıtqanda, ǵylymdaǵy jetistikteri úshin «Jáńgir han atyndaǵy Batys Qazaqstan agrarlyq-tehnıkalyq ýnıversıteti» KeAQ zerthanasynyń jetekshisi Sársenbek Montaev «Parasat» ordenimen nagradtaldy.

Sonymen qatar Memleket basshysy Sáken Seıfýllın atyndaǵy Qazaq agrotehnıkalyq zertteý ýnıversıtetiniń úsh jas ǵalymyna páter kiltterin tabystady.

Olar – ýnıversıtettiń Jas ǵalymdar keńesiniń tóraıymy, «Ósimdik sharýashylyǵy» baǵyty boıynsha qaýymdastyrylǵan professor mindetin atqarýshy, PhD Rahııa Elnazarqyzy, «Azyq-túlik ónimderin óndirý» baǵyty boıynsha qaýymdastyrylǵan professor mindetin atqarýshy, PhD Elmıra Bazylhanova, sondaı-aq «Elektrmen jabdyqtaý» baǵyty boıynsha aǵa oqytýshy, PhD Artýr Nogaı.

Rahııa Elnazarqyzynyń aıtýynsha, kórsetilgen qurmet ǵylymı qaýymdastyq eńbegine berilgen joǵary baǵa men erekshe iltıpattyń kórinisi.

– Ǵylym – damýshy memlekettiń berik irgetasy, al ǵalymdar eldiń basty strategııalyq resýrsy bolyp qala beredi, – dedi ol.

Aıta keteıik, Almatyda balalarǵa arnalǵan alǵashqy ǵylym mýzeıi ashylady.