Prezıdent: Ádiletti Qazaqstan – bos ıdeologııalyq abstraktsııa emes

ASTANA. KAZINFORM –  Memleket basshysy Qasym-Jomart Toqaev BAQ salasy qyzmetkerlerin marapattaý rásiminde sóılegen sózinde kózsiz madaq pen ólsheýsiz synnyń qoǵamǵa tıgizer zııany týraly paıymyn aıtty.

«Ultymyz qarqyndy damýy úshin qazirgi ózekti problemalar jóninde shynaıy kózqaras qalyptastyryp, ashyq pikir almasý mańyzdy. Bizge aldamshy jeńister men jetistikterge áýestenip ketýdiń qajeti joq. Óz-ózińdi aldaýǵa, madaqtaýǵa bolmaıdy. Bul – ydyraýǵa jáne quldyraýǵa ákep soqtyratyn tóte jol. Sonymen qatar sóz bostandyǵyna arqa súıep, elimizde eshteńe ózgermeıdi-mys, ahýal múshkil dep jaǵdaıdy únemi ýshyqtyra berý qajet emes. Bul shyndyqqa saı kelmeıdi. Kemshilikter bar, biraq jaǵdaı tym múshkil emes. Mundaı aqparat adamdarǵa kómektespeıdi, kerisinshe olardy kúızeliske ushyratyp, qoǵamda apatııa týdyrady», - dedi Qasym-Jomart Toqaev.

Memleket basshysy oń ózgerister kúndelikti qajyrly eńbekti talap etetinin atap ótti.

«Biz Ádiletti Qazaqstan qurýǵa umtylamyz. Bul – bos ıdeologııalyq abstraktsııa emes, shynaıy jalpyulttyq tańdaý. Biz zor senim artyp, kúsh-qýatymyzdy aıanbaı jumsaıtyn asqaq murat túbi shyndyqqa aınalady», - dedi Q.Toqaev.