Prezıdent Ádilet mınıstrine Bas prokýratýramen tyǵyz qarym-qatynasta jumys isteýdi tapsyrdy
Memleket basshysy Qasym-Jomart Toqaev Ádilet mınıstri Azamat Esqaraevty qabyldady, dep habarlaıdy QazAqparat.
Prezıdentke ádilet organdarynyń bıylǵy 9 aıda atqarǵan jumysynyń qorytyndysy men aldaǵy jospary jóninde baıandaldy.
Azamat Esqaraevtyń qabyldanyp jatqan zańnamalyq sharalar, atap aıtqanda Qylmystyq, Qylmystyq-protsestik, Qylmystyq-atqarý, Ákimshilik quqyq buzýshylyq kodeksterin ońtaılandyrý úshin ázirlengen zań jobalary, sondaı-aq ákimshilik ádilet salasyn jetildirý jáne keńeıtý máseleleri jóninde málimet berdi.
Azamattyq hal aktilerin tirkeý, jyljymaıtyn múlikke qatysty quqyqtar, notarıattyq, advokattyq qyzmetter, atqarýshylyq is júrgizý salalaryndaǵy jańalyqtar jáne zııatkerlik menshik quqyqtaryn qorǵaý sharalary týraly aıtty.
Qasym-Jomart Toqaev Azamat Esqaraevqa «Zańsyz ıemdenilgen aktıvterdi memleketke qaıtarý týraly» Zańdy júzege asyrýǵa qatysty zańǵa táýeldi aktilerdi jedel qabyldaý úshin Bas prokýratýramen tyǵyz qarym-qatynasta jumys isteýdi tapsyrdy.
Sonymen qatar Prezıdent zańdar men zańǵa táýeldi aktilerdi qabyldaý kezinde múddeli memlekettik organdarmen úılesimdi jumys istep, Konstıtýtsııa talaptarynyń saqtalýyn qamtamasyz etý qajet ekenin atap ótti.
