Prezıdent «Adamzat baýyrlastyǵy» syılyǵyn tapsyrý rásimine qatysýshylarǵa beıneúndeý joldady
ASTANA. KAZINFORM – Memleket basshysy Abý-Dabıde ótken saltanatty is-sharada kórsetilgen beıneúndeýinde Ázerbaıjan Prezıdenti Ilham Álıev pen Armenııa Premer-mınıstri Nıkol Pashınıandy sheıh Zaıd atyndaǵy «Adamzat baýyrlastyǵy» syılyǵyna ıe bolýymen quttyqtady. Qazaqstan Prezıdenti bul marapat olardyń parasatty kóshbasshylyǵyna berilgen baǵa ekenin atap ótti. Bul týraly Aqorda habarlady.
– Ázerbaıjan men Armenııanyń beıbit kelisim jolynda qol jetkizgen jetistigi tarıhtyń betburys kezeńi sanalady. Bul qadam dıalog júrgizip, jaýapkershilik pen ustamdylyq tanyta bilsek, uzaq jyldarǵa sozylǵan qaqtyǵystyń da túıinin tarqatýǵa bolatynyn dáleldeıdi. Memleketterdiń jik-jikke bólinýi ulǵaıyp, ózara qarym-qatynastarǵa kóptep syzat túse bastaǵan zamanda bul tájirıbeniń mańyzy zor. Óıtkeni atalǵan mysaldan tatýlasýdyń álsizdik emes, myqtylyqtyń belgisi ekenin kóremiz, – dedi Qasym-Jomart Toqaev.
Prezıdent úndeýde Qazaqstan tarapynyń memleketimizge artylǵan senimdi, sonyń ishinde Ázerbaıjan men Armenııa arasyndaǵy beıbit kelisimderdiń negizgi bir kezeńin Almatyda ótkizý týraly sheshimdi joǵary baǵalaıtynyn jetkizgen.
– Bul jaǵdaı «syndarly dıalog – ornyqty damýdyń kepili» degen ortaq kózqarasymyzdy aıǵaqtaıdy. Qazaqstan Eýrazııa keńistigindegi jáne odan tysqary jerlerdegi beıbitshilikti, senim men yntymaqtastyqty nyǵaıtýǵa baǵyttalǵan bastamalardy dáıekti túrde qoldap keledi, – dedi Memleket basshysy.
Qasym-Jomart Toqaev syılyqtyń beıbitshilikti nyǵaıtý isinde aıryqsha ról atqaratynyna nazar aýdaryp, atalǵan qundylyqtardy udaıy ilgeriletkeni úshin BAÁ Prezıdenti sheıh Muhammed ben Zaıd Ál Nahaıanǵa rızashylyǵyn bildirdi.
– Sheıh Zaıd ben Sultan Ál Nahaıannyń toleranttyq, ózara qurmet pen beıbit qatar ómir súrý ıdealdaryna negizdelgen óshpes ósıet-ónegesi osy marapatta kórinis tapqan. Bul qaǵıdattar naqty saıası nátıjege ulasyp otyr. Ázerbaıjan men Armenııa arasynda beıbitshilik ornap, yntymaqtastyqtyń jandanýy osy qasterli amanatqa jańa mazmun darytyp, onyń aımaqtan tys jerlerde de ózekti ekenin kórsetti. Halyqaralyq qatynastardaǵy pármendi qural retinde dıplomatııaǵa senimdi kúsheıte tústi, – dedi Memleket basshysy.
Qazaqstan Prezıdentiniń pikirinshe, Ázerbaıjan men Armenııa basshylarynyń beıbitshilik ornatýǵa degen shynaıy nıeti mıllıondaǵan adamǵa úmit syılady, tatý kórshilik qatynastar men turaqtylyq jahandyq kún tártibinde árdaıym mańyzdy ekenin álemdik qaýymdastyqqa anyq ańǵartty.
Sheıh Zaıd atyndaǵy «Adamzat baýyrlastyǵy» syılyǵy – 2019 jyly taǵaıyndalǵan táýelsiz halyqaralyq marapat. Onyń maqsaty – beıbitshilikti, ózara túsinistikti nyǵaıtýǵa, sondaı-aq halyqtar men mádenıetter arasyndaǵy yntymaq pen tatýlyqty dáripteýge eleýli úles qosqan tulǵalardy yntalandyrý.
Ár jyldary Rım Papasy Frantsısk, BUU Bas hatshysy Antonıý Gýterrısh, IMAD qaýymdastyǵynyń negizin qalaýshy ári ekstremızmmen kúres boıynsha belsendi Latıfa Ibn Zıaten, Iordanııa Koroli II Abdalla, Patshaıym Ranııa jáne basqa da qaıratkerler syılyq laýreattary atandy.
Buǵan deıin Ázerbaıjan prezıdenti men Armenııa premeri «Adamzat baýyrlastyǵy» syılyǵymen marapattalǵanyn jazǵan bolatynbyz.