Prezıdent: Adamnyń qadir-qasıeti men halyqaralyq quqyq bir-birimen tyǵyz baılanysty
ALMATY. KAZINFORM — Almaty qalasyndaǵy BUU óńirlik ortalyǵynda Qasym-Jomart Toqaev Aýǵanstannyń beıbit ómiri men ornyqty damýy aımaqtaǵy qaýipsizdikti qamtamasyz etý turǵysynan aıryqsha mańyzǵa ıe ekenin aıtty. Bul týraly Aqorda málim etti.
– Qazaqstan gýmanıtarlyq kómek kórsetýge, bilim berý baǵdarlamalaryn júzege asyrýǵa, saýda-sattyqty jandandyrýǵa jáne azyq-túlik qaýipsizdigine qatysty bastamalar arqyly aýǵan halqyna qoldaý kórsetýdi jalǵastyrady. Eki el arasyndaǵy saýda kólemi udaıy ósip keledi. Biz Aýǵanstannyń beıbit tirshiligi men damýy qatar júrýi kerek dep sanaımyz. Adamnyń qadir-qasıeti men halyqaralyq quqyq bir-birimen tyǵyz baılanysty. Olardy qamtamasyz etýge kúsh jumyldyrmaıynsha, turaqtylyqqa qol jetkizý múmkin emes, – dedi Prezıdent.
Memleket basshysy Qazaqstan Ornyqty damý maqsattaryn óziniń ulttyq strategııasynyń basymdyqtary retinde qarastyratynyn aıtty.
– Jetistikterimiz kóp. Alaıda biz ekonomıkalyq damýdy jedeldetýge jáne azamattarymyzdyń quqyqtyq qajettilikterin óteýge qatysty josparlarymyzdy qalaıda iske asyrýymyz kerek. Maqsatymyz – jan-jaqty ekonomıkalyq reforma júrgizý, zań men tártip ústemdigine negizdelgen qoǵam qurý isinde Qazaqstannyń aımaqtaǵy jetekshi rólin saqtap qalý. Biz adamnyń negizgi quqyqtaryn qamtamasyz etetin, joǵary ekologııalyq standarttardy saqtaıtyn Ádiletti memleket qurǵymyz keledi. Tsıfrlandyrý men jasandy ıntellektini odan ári damytýǵa basa mán beremiz. Sondaı-aq Qazaqstandy halyqaralyq júk tasymaly boıynsha eýrazııalyq habqa aınaldyrý úshin ártaraptandyrylǵan kólik ınfraqurylymyn qalyptastyrýǵa kúsh salamyz, – dedi Qasym-Jomart Toqaev.
Prezıdent ortaq ıgilikke qol jetkizý úshin úkimetti, azamattyq qoǵamdy jáne jeke sektordy birlese jumys isteýge shaqyrdy. Tek sonyń arqasynda Ortalyq Azııa shyn máninde turaqtylyqtyń, múmkindikter men ornyqty ósimniń mekeni retinde damı alady. Memleket basshysy sózin qorytyndylaı kele, osyndaı qıly kezeńde joǵary dıplomatııa men kóshbasshylyq úlgisin kórsetip kele jatqan BUU Bas hatshysy Antonıý Gýterrıshke alǵys aıtty. Prezıdent elimizdiń Uıym Bas hatshysynyń bastamalaryna aldaǵy ýaqytta da qoldaý bildiretinin jetkizdi.
Eske sala keteıik, búgin Prezıdent pen Antonıý Gýterrısh Almaty qalasyndaǵy BUU óńirlik ortalyǵyna bardy.