Prezıdent adam quqyqtary jónindegi ýákil Artýr Lastaevty qabyldady

ASTANA. KAZINFORM — Memleket basshysy adam quqyqtary jónindegi ýákil Artýr Lastaevty qabyldady. 

Prezıdentke azamattardyń quqyqtaryn qaıta qalpyna keltirý jáne qorǵaý jónindegi jyldyq esep berildi.

Artýr Lastaev aýmaqtyq ókilderdiń tolyqtaı iske kiriskeni jaıynda málimet berdi. 

Onyń aıtýynsha, byltyr ombýdsmenniń atyna 5 myńnan astam ótinish túsken. Bul 2022 jylǵy kórsetkishpen salystyrǵanda 1,5 ese kóp. 

Ulttyq preventıvti mehanızmniń jumysy, zańnamany jetildirý, halyqaralyq yntymaqtastyqty, quqyq qorǵaý uıymdarymen jáne azamattyq qoǵammen ózara yqpaldastyqty jandandyrý máseleleri jóninde baıandaldy. 

Atap aıtqanda, azaptaýdyń aldyn alý úshin oqshaýlaý mekemelerinde myńnan astam kezdesý ótkizilgen.

Azamattardyń quqyǵyn qalpyna keltirý boıynsha 3,5 myńnan usynym berilgen, 275 laýazymdy tulǵa jaýapkershilikke tartylǵan.

Nátıjesinde 900-den astam adamnyń quqyǵy qorǵalǵan.

Adam quqyqtary jónindegi ýákil Prezıdenttiń turmystyq zorlyq-zombylyqtyń aldyn alý jónindegi tapsyrmasyn oryndaý maqsatynda qabyldanǵan sharalar týraly aıtty.

Quqyq qorǵaý ınstıtýty turmystyq zorlyq-zombylyqqa qarsy is-qımyl týraly arnaıy baıandama ázirlep jatyr.

Qasym-Jomart Toqaev adam quqyǵyn qorǵaýǵa kepildik berý isin odan ári kúsheıtý qajet ekenine nazar aýdardy.