Prezıdent «Adal azamat» baǵdarlamasyn pedagog mamandar daıarlaıtyn JOO-larda da engizýdi usyndy

ASTANA. KAZINFORM – Ulttyq bilim salasyndaǵy tárbıe jumysynda birtutas júıe bolýy kerek. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.

- Bilim tárbıemen ushtasqanda ǵana berekeli, sapaly bolady. Bilim men tárbıe – kez kelgen qoǵamnyń qos tuǵyry. Bul ekeýin bir-birinen bólip qaraýǵa bolmaıdy. Mektep – bilim men tálim-tárbıeniń kıeli ordasy. Uly Abaı «Adam balasy adam balasynan aqyl, ǵylym, ar, minez degen nárselermen ozbaq» degen. Óskeleń urpaqty bilimpazdyqqa baýlý qanshalyqty mańyzdy bolsa, olarǵa durys jol kórsetý, baǵdar berý de sonshalyqty mańyzdy. Biz jastardyń adal ári eńbekqor bolyp ósýine erekshe mán berýimiz qajet. Ul-qyzdarymyz jaqsy men jamannyń, aq pen qaranyń arasyn ajyrata bilýi kerek, - dedi Memleket basshysy.

Prezıdenttiń atap ótýinshe, bıyldan bastap elimizde «Adal azamat» birtutas tárbıe baǵdarlamasy júzege asyryla bastaıdy. Bul baǵdarlamany barlyq mektep, sonyń ishinde jekemenshik mektepter de qoldanady.

- Sondaı-aq, men osy jobany pedagog mamandar daıarlaıtyn joǵary oqý oryndaryna da engizýdi usynamyn. Ulttyq bilim salasyndaǵy tárbıe jumysynda birtutas júıe bolýy kerek. Jas urpaqtyń boıyna jalpyulttyq qundylyqtardy sińirý qajet. Árbir jas otanshyl, jasampaz, jańashyl, bilimpaz, eńbekqor, uqypty, únemshil bolyp ósýi kerek. Sondaı azamattar ǵana mádenıetti, qaýipsiz ári «Zań men tártip» ústemdik quratyn qoǵamnyń irgesin qalamaq, - dedi Qasym-Jomart Toqaev.

Memleket basshysynyń paıymynsha, muǵalimder memlekettik mańyzy bar jumysty atqaryp jatyr. 

Degenmen, ustazdyń nazary bala oqytý isinde bolýǵa tıis.