Prezıdent Abaı oblysy basshylyǵynyń jumysyna joǵary baǵa berdi
Memleket basshysy elimizdiń mádenı-tarıhı ortalyǵy – Semeı qalasynyń ınfraqurylymy onyń mártebesine saı bolýy kerektigin tilge tıek etti. Abaı oblysynyń ákimi Qazaqstan Prezıdentine bergen esebinde qalanyń damýyna da jeke toqtaldy.
Astanada áleýmettik-ekonomıkalyq damý máselelerine arnalǵan keńeste Memleket basshysy Abaı oblysynyń ákimi Nurlan Uranhaevtyń esebin tyńdady. Qasym-Jomart Toqaev óńirdiń ákimshilik ortalyǵy erekshe mańyzǵa ıe ekenin atap ótti.
«Semeı qalasy elimizdegi ádemi ári tarıhı ortalyqtardyń biri bolyp sanalady. Shahardyń kelbeti laıyqty kórinýi úshin ony abattandyrýǵa erekshe nazar aýdarý qajet. Árıne, ınfraqurylymdy da jańartý kerek, sondyqtan jumys kóp», - dedi Memleket basshysy.
Nurlan Uranhaev óz baıandamasynda Semeı qalasy bıýdjetiniń aıtarlyqtaı ulǵaıǵanyn jáne qalanyń eń ózekti jáne qordalanǵan máselelerin sheshý joldaryn atap ótti.
«Semeı qalasynyń tarıhı-mádenı jáne jańa ákimshilik ortalyq mártebesin, sondaı-aq óńir halqynyń 60 paıyzǵa jýyǵy qalada turatynyn eskere otyryp, oblys ortalyǵynyń damýy erekshe baqylaýda. Osylaısha, bıyl Semeı qalasynyń bıýdjeti 85 mlrd teńgeden asty, bul ótken jylmen salystyrǵanda shamamen 50 paıyzǵa kóp», - dedi óńir basshysy.
Turǵyn úı-kommýnaldyq sharýashylyq salasyn qarjylandyrý kólemi 1,4 ese, halyqty áleýmettik qorǵaý 1,5 ese ulǵaıtyldy.
2023-2024 jyldary Semeı qalasyn jylýmen qamtý máselelerin sheshý úshin Óńirdi damytýdyń keshendi josparyna jylý kózderin qaıta jańǵyrtý jáne jelilerdi jańǵyrtý boıynsha 150 mlrd teńgeden astam somaǵa 30 joba engizilgen.
Baıandama sońynda Memleket basshysy atqarylǵan jumystardyń nátıjesin joǵary baǵalap, ony barlyq salalarda jalǵastyrýdy tapsyrdy.
«Qysqa merzimde kóp jumys isteldi. Muny moıyndaý kerek. Biraq alda áli de jumys kóp. Sheshilmegen máseleler bar. Sondyqtan bul jumysty keshendi túrde júrgizý kerek», - dedi Qasym-Jomart Toqaev.
